Թրամփը հայտարարել է, որ ԱՄՆ-ը պատրաստ է ուժեղացնել հարվածները Իրանի դեմ

ԱՄՆ նախագահ Դոնալդ Թրամփը հայտարարել է, որ Իրանի դեմ իրականացված գիշերային հարվածներից հետո Վաշինգտոնը պատրաստ է շարունակել ուժային ճնշումը, եթե Թեհրանը չգնա համաձայնության։ Այդ մասին նա ասել է Fox News-ին տված հարցազրույցում։

Լրագրող Թրեյ Ինգստի փոխանցմամբ՝ զրույցը տեղի է ունեցել այն պահին, երբ ԱՄՆ նախագահը հետևում էր գործողություններին իրավիճակային կենտրոնից։ Թրամփի խոսքով՝ ԱՄՆ-ը Իրանի ուղղությամբ արձակել է 49 «Թոմահոք» հրթիռ։

Նա նշել է, որ հարվածները կարող են շուտով ավարտվել, սակայն եթե իրանական կողմը չստորագրի համապատասխան համաձայնագիր, ԱՄՆ-ը կարող է անցնել ավելի լայնածավալ գործողությունների։ Իր խոսքում Թրամփը նաև կոշտ ձևակերպումներ է օգտագործել՝ ընդգծելով Վաշինգտոնի պատրաստակամությունը շարունակել ճնշումը։

Ավելի վաղ Թրամփը հայտարարել էր, որ Միացյալ Նահանգները դիտարկում է Իրանի նավթային ենթակառուցվածքների նկատմամբ վերահսկողություն հաստատելու տարբերակները, այդ թվում՝ Պարսից ծոցի հյուսիսային հատվածում գտնվող Խարկ կղզու ուղղությամբ։