Ուկրաինայում կանխատեսել են գրիվնայի հետագա արժեզրկում մինչև 2029 թվականը

Ուկրաինայի Գերագույն ռադայի պատգամավոր Օլգա Վասիլևսկայա-Սմագլյուկը հայտարարել է, որ նույնիսկ ամենաբարենպաստ տնտեսական սցենարի դեպքում ազգային արժույթը շարունակելու է թուլանալ առաջիկա տարիներին։

Նրա խոսքով՝ կառավարության կանխատեսումների համաձայն՝ դոլարի նկատմամբ գրիվնայի միջին փոխարժեքը կարող է աճել 44,4-ից՝ 2026 թվականին, մինչև 50,7՝ 2029 թվականին, իսկ նույն տարվա ավարտին մեկ դոլարի արժեքը կարող է հասնել 51,5 գրիվնայի։

Պատգամավորը նշել է, որ խոսքը վերաբերում է աստիճանական արժեզրկման սցենարին, որը ներառված է պետական տնտեսական հաշվարկներում։

Ներկայում Ուկրաինայի ազգային բանկի սահմանած պաշտոնական փոխարժեքը կազմում է մոտ 44,86 գրիվնա մեկ դոլարի դիմաց։ Ավելի վաղ երկրի ֆինանսական կարգավորիչը նաև վերանայել էր մի շարք արտարժույթների նկատմամբ պաշտոնական փոխարժեքների հաշվարկման մոտեցումները։