Թրամփը հոգնել է Նեթանյահուի հետ հեռախոսազրույցներից․ WSJ

ԱՄՆ նախագահ Դոնալդ Թրամփը դժգոհություն է հայտնել Իսրայելի վարչապետ Բենիամին Նեթանյահուի հետ հաճախակի հեռախոսազրույցներից, քանի որ դրանք, ըստ տեղեկությունների, հիմնականում վերաբերել են նոր ռազմական գործողությունների անհրաժեշտությանը։ Այդ մասին գրում է The Wall Street Journal-ը՝ հղում անելով ամերիկյան վարչակազմի բարձրաստիճան ներկայացուցչին։

Աղբյուրի խոսքով՝ Նեթանյահուն սովորաբար բացատրել է, թե ինչու է անհրաժեշտ հերթական հարվածը, ինչ հնարավորություններ ունի իսրայելական հետախուզությունը և ինչու պետք է գործել հենց տվյալ պահին։

Թերթի զրուցակիցների պնդմամբ՝ Լիբանանի շուրջ վերջին զրույցներից մեկի ընթացքում Թրամփը նույնիսկ հարցրել է, թե ինչու են շարունակվում նման գործողությունները և կոչ արել դադարեցնել դրանք։

WSJ-ի տվյալներով՝ այդ խոսակցություններից հետո ԱՄՆ նախագահը սկսել է ավելի հաճախ իր վարչակազմի անդամներից հետաքրքրվել, թե որքանով են ճշգրիտ Նեթանյահուի ներկայացրած գնահատականներն ու տեղեկությունները։

Ավելի վաղ հաղորդվել էր, որ Իսրայելում դժգոհություն են հայտնել Իրանի և ԱՄՆ-ի միջև ձեռք բերված համաձայնությունից՝ մտահոգություն հայտնելով դրա հնարավոր հետևանքների վերաբերյալ։