Reuters․ Ուկրաինական ԱԹՍ-ների հարվածից հետո Մոսկվայում հրդեհ է բռնկվել նավթավերամշակման գործարանում

Reuters-ի հաղորդմամբ՝ հունիսի 18-ին ուկրաինական անօդաչու թռչող սարքերը հարվածել են Մոսկվայի հարավարևելյան հատվածում գտնվող նավթավերամշակման գործարանին՝ վերջին երեք օրում արդեն երկրորդ անգամ։ Հրապարակման համաձայն՝ հարվածից հետո տարածքում խոշոր հրդեհ է բռնկվել, իսկ սև ծուխը տարածվել է քաղաքի մի շարք հատվածներում։

Գործարանը գտնվում է Մոսկվայի օղակաձև ճանապարհի ներսում՝ Կրեմլից մոտ 16 կիլոմետր հեռավորության վրա։ Reuters-ը նշում է, որ նման թիրախների ընտրությունը կարող է ունենալ ոչ միայն տնտեսական, այլ նաև խորհրդանշական նշանակություն։

Ուկրաինայի արտգործնախարար Անդրեյ Սիբիգան X հարթակում գրել է, որ Մոսկվայի բնակիչների հարցին՝ «ինչ է կատարվում», պատասխանը պետք է փնտրել պատերազմի շարունակման մեջ։ Ուկրաինական կողմը նման հարվածները ներկայացնում է որպես փորձ՝ ցույց տալու, որ պատերազմը զգացվում է նաև Ռուսաստանի խորքում։

Միաժամանակ Կրեմլի ներկայացուցիչները հերքել են այն պնդումները, թե ռազմաճակատում իրավիճակը փոխվում է Ուկրաինայի օգտին։

Reuters-ի տվյալներով՝ միջադեպից հետո Մոսկվայում ժամանակավորապես սահմանափակվել է օդանավակայանների աշխատանքը, դադարեցվել է երթևեկությունը որոշ հատվածներում, իսկ «Շերեմետևո» օդանավակայանում իրականացվել են տարհանման միջոցառումներ։

Հրապարակման մեջ նաև նշվում է, որ վերջին շաբաթներին Ռուսաստանի որոշ շրջաններում արձանագրվել են վառելիքի մատակարարման դժվարություններ, թեև Մոսկվայի իշխանությունները հայտարարել են, որ մայրաքաղաքում իրավիճակը մնում է վերահսկելի։