Գործն ուղղակի աբսուրդային է , երկու օրում գործ են ստեղծել․ Ռոբերտ Քոչարյանն՝ իր դեմ հարուցված քրգործի մասին

ՀՀ երկրորդ նախագահ Ռոբերտ Քոչարյանը հարցազրույց է տվել լրատվամիջոցներին։ Անդրադառնալով իր դեմ հարուցված քրեական գործի մանրամասներին, Քոչարյանը արձագանքել է․

«Գործն ուղղակի աբսուրդային է և կապված է իմ Հայաստանից երեք օրով մեկնելու հետ, ուղղակի, շատ արագ՝  երկու օրում գործ են ստեղծել»։

Նա ընդգծեց, որ դրանից առաջ, լրատվամիջոցների հարցմանն ի պատասխան, որևէ քրեական գործ չկար, սակայն մեկ օր անց պարզվում է, որ այդպիսի գործ արդեն կա։ 

«Այո, հրավիրվել եմ Հակակոռուպցիոն կոմիտե, ծանոթացել եմ։ Աբսուրդ է, ուղղակի, նույնիսկ չգիտեմ՝ ինչ ասել։ Ամբողջ այդ մեղադրանքի մեջ նկարագրված գործողությունը , որը վերաբերում է ինձ որպես նախագահ այն է, որ 2004 թ․-ին վավերացրել եմ կառավարության որոշումը։ Վերջ, ուրիշ որևէ գործունեություն, որևէ կապ իմ հետ այս ամբողջ պատմությունը չունի։

Խնդիրը հետևյալի մեջ է՝ 1995թ․-ին ընդունված Սահմանադրությամբ նախագահը վավերացնում է կառավարության որոշումները։ Դա նախագահի  պարտականությունն էր։Ոչ թե հաստատում է, նախագահը չի հաստատում կառավարության որոշումները, նախագահության այն կարգավորումներով սահմանադրական պահանջերը վավերացնում է։ Սա նշանակում է մեկ բան՝ դու կապ չունես բովանդակության հետ։ Դու վավերացնում ես, որ այն  իսկապես կառավարության որոշում է, և վավերացնում ես, որ այն հրապարակվի։ Բոլոր կառավարության որոշումները՝ 1995 թ․ից մինչև 2007 թթ․-ը վավերացվում էին նախագահների կողմից, այդպիսին էր սահմանադրական պահանջը»,- մանրամասնեց Ռոբերտ Քոչարյանը։