ԱՄՆ Կոնգրեսի հանձնաժողովը կոչ է անում Ադրբեջանին ազատ արձակել հայ գերիներին

ԱՄՆ Ներկայացուցիչների պալատի արտաքին գործերի հանձնաժողովը կոչ է արել Ադրբեջանին անհապաղ ազատ արձակել Բաքվում պահվող հայ ռազմագերիներին և պատանդներին։ Այս մասին տեղեկացնում է Ամերիկայի Հայ դատի հանձնախումբը (ANCA)։

Հանձնաժողովը 44 կողմ և 7 դեմ ձայների հարաբերակցությամբ հավանություն է տվել H.R. 9087 օրինագծում կատարված փոփոխությանը, որով Ադրբեջանին կոչ է արվում անհապաղ և անվերապահորեն ազատ արձակել բոլոր հայ պատանդներին։

Փոփոխության հեղինակն է Կոնգրեսի հայկական հարցերով հանձնախմբի փոխնախագահ, կոնգրեսական Բրեդ Շերմանը (Կալիֆոռնիա), իսկ նախաձեռնությունը ստացել է հանձնաժողովի նախագահ Բրայան Մաստի (Ֆլորիդա) աջակցությունը։

«Հպարտ եմ, որ Կոնգրեսում հստակ արտահայտել եմ իմ դիրքորոշումը և շարունակելու եմ պայքարել Ադրբեջանի կողմից անօրինական կերպով պահվող, խոշտանգումների և բռնությունների ենթարկվող հայերի ազատ արձակման համար»,- հայտարարել է Շերմանը։

ANCA-ի գործադիր տնօրեն Արամ Համբարյանն էլ ընդգծել է, որ հայ պատանդների ազատ արձակումը, Արցախի տեղահանված բնակիչների անվտանգ վերադարձը և Հայաստանի ինքնիշխան տարածքից ադրբեջանական զորքերի դուրսբերումը պետք է դիտարկվեն որպես կայուն խաղաղության անհրաժեշտ նախապայմաններ, այլ ոչ թե որպես քաղաքական ճնշման միջոցներ։