Կառավարությունը հաստատել է ՀԱԷԿ-ի երկրորդ էներգաբլոկի շահագործման ժամկետի երկարացման ծրագրի ընթացքը

Հայաստանի կառավարությունը հուլիսի 23-ի նիստում հաստատել է Հայկական ատոմային էլեկտրակայանի երկրորդ էներգաբլոկի շահագործման ժամկետի կրկնակի երկարացման ծրագրով նախատեսված միջոցառումների կատարման ընթացքի վերաբերյալ հաշվետվությունը։ Հարցն ընդգրկված էր Կառավարության նիստի չզեկուցվող հարցերի փաթեթում։

Ծրագրում ընդհանուր առմամբ ներառված է 103 միջոցառում։ «Ռուսատոմսերվիս» ընկերության պատասխանատվության ներքո գտնվող 23 խոշորացված միջոցառման շրջանակում կնքվել է 18 պայմանագիր։ Դրանցից 9–ը կատարման փուլում է, իսկ ինը պայմանագրով աշխատանքներն ավարտվել են։

ՀԱԷԿ-ի պատասխանատվության ներքո գտնվող 37 խոշորացված միջոցառման համար կազմակերպվել է 45 գնման ընթացակարգ։ Կնքվել է 36 պայմանագիր, որոնցից 17-ով աշխատանքներն ավարտված են։

«Ռուսատոմսերվիս»-ի հետ 2023 թվականի դեկտեմբերին կնքվել է շուրջ 57,5 միլիոն դոլարի շրջանակային համաձայնագիր։

Էներգաբլոկի անվտանգության գնահատման շրջանակում իրականացվել են հրդեհների ազդեցության, հավանականային անվտանգության, գործող նորմերի պահանջներից շեղումների և անվտանգության բարձրացման լրացուցիչ միջոցառումների վերաբերյալ ուսումնասիրություններ։ Հաշվետվությունների մի մասը ներկայացվել է Միջուկային անվտանգության կարգավորման կոմիտեի դիտարկմանը։

ՀԱԷԿ-ի երկրորդ էներգաբլոկի շահագործման ժամկետի կրկնակի երկարացման ծրագրով նախատեսված աշխատանքները շարունակվում են։