«Մարտի 1-ի 10 մահերի պատճառը եղել է պետությունը, որը ղեկավարում էր ձեր հայրը»․ Ռուբեն Ռուբինյանը՝ Լևոն Քոչարյանին

ԱԺ նախագահ Ռուբեն Ռուբինյանը, արձագանքելով «Հայաստան» խմբակցության պատգամավոր Լևոն Քոչարյանի՝ 2008 թվականի մարտի 1-ի իրադարձություններին վերաբերող ելույթին, հայտարարել է, որ Քոչարյանը, լինելով երիտասարդ և Ռոբերտ Քոչարյանի որդին, հնարավոր է՝ ամբողջությամբ չի տեսել այդ ժամանակվա իրականությունը։

«Դուք խոսում եք մարտի 1-ի մասին և երևի հույս եք դրել, որ երիտասարդները, որոնք այդ օրերին չեն ապրել, պետք է լսեն ու հավատան ձեզ»,- ասել է Ռուբինյանը։

Նրա խոսքով՝ 2008 թվականի մարտի 1-ի առավոտյան ժամը 06:00-ին Ազատության հրապարակում եղել է շուրջ 100-200 մարդ, որոնց մեծ մասը քնած է եղել։ Ռուբինյանը պնդել է, որ այդ պահին մարդիկ որևէ գործողություն չեն իրականացրել, սակայն հատուկ ջոկատայինները եկել են և սկսել նրանց ծեծել մահակներով։

«Հիմա խնդրում եմ ասել՝ այդ մարդիկ ի՞նչ էին արել, ինչո՞ւ էին հատուկ ջոկատայինները առավոտյան 6-ին եկել ու այդ մարդկանց դուբինկաներով ծեծել»,- նշել է ԱԺ նախագահը։

Ռուբինյանը նաև անդրադարձել է ՄԻԵԴ-ի՝ մարտի 1-ի գործով որոշմանը՝ հայտարարելով, որ արձանագրվել է պետության պատասխանատվությունը 10 զոհերի համար։ «Այդ պետությունը ղեկավարում էր ձեր հայրը՝ Ռոբերտ Քոչարյանը»,- ասել է նա։

ԱԺ նախագահը խոսել է նաև Ռոբերտ Քոչարյանի նախագահության տարիներին Հայաստանի և Ադրբեջանի ռազմական բյուջեների տարբերության մասին՝ նշելով, որ այդ ժամանակահատվածում փոփոխություններ են եղել նաև տնտեսական ցուցանիշներում։ Նա նաև քննադատական արտահայտություն է արել Քոչարյանների ընտանիքի ունեցվածքի վերաբերյալ։