Արթուր Հովհաննիսյանը՝ Լևոն Քոչարյանին. «Ընտրակեղծիքների հետքը հենց ձեր քաղաքական ուժի մոտ է»

ԱԺ-ում ելույթի ընթացքում «Քաղաքացիական պայմանագիր» խմբակցության պատգամավոր Արթուր Հովհաննիսյանն արձագանքել է «Հայաստան» խմբակցության պատգամավոր Լևոն Քոչարյանի հայտարարություններին՝ կապված ընտրակեղծիքների վերաբերյալ մեղադրանքների հետ։

Հովհաննիսյանի խոսքով՝ ընդդիմությունն ինքն է այն համակարգի քաղաքական ժառանգորդը, որը տարիներ շարունակ կապվել է ընտրակեղծիքների, վարչական ճնշումների և կոռուպցիոն երևույթների հետ։

«Դուք այսօր նստած եք այս դահլիճում նաև այն պատճառով, որ ձեր ստեղծած քրեաօլիգարխիկ և ընտրակեղծարար համակարգի որոշ մեխանիզմներ վերարտադրվել են՝ փողի բաժանման, ճնշումների և այլ գործիքների կիրառմամբ։ Այդ ամենի նպատակն է շարունակել պաշտպանել նախկին համակարգի շահերը և պահպանել ապօրինի ձեռք բերված գույքը»,- հայտարարել է պատգամավորը։

Նա նաև անդրադարձել է Լևոն Քոչարյանի արձագանքին՝ նշելով, որ քննադատությունը վերաբերում է ոչ թե ընտանեկան կապերին, այլ քաղաքական գործունեությանը և պատասխանատվությանը։

«Մենք խոսում ենք Հայաստանի երկրորդ նախագահի պաշտոնը զբաղեցրած Ռոբերտ Քոչարյանի քաղաքական գործունեության մասին։ Դուք ներկայացնում եք այն քաղաքական ուժը, որը կրում է այդ քաղաքական ժառանգության պատասխանատվությունը և շարունակում է նույն քաղաքական գիծը»,- ասել է Հովհաննիսյանը։

Պատգամավորը քննադատել է նաև Լևոն Քոչարյանի այն հայտարարությունը, թե որոշ հարցեր կարող են լուծվել «այլ հարթությունում»՝ այն կապելով Հայաստանի քաղաքական պատմության ողբերգական էջերի հետ։

«Երբ ասում եք՝ այդ հարցը կլուծենք այլ հարթությունում, ի՞նչ նկատի ունեք։ Հայաստանի քաղաքական պատմության մեջ եղել են ծանր և ցավալի իրադարձություններ, որոնց մասին հասարակությունը չի մոռացել»,- նշել է Հովհաննիսյանը՝ դիմելով ընդդիմադիր պատգամավորին։