Վանաձորի և Գյուլագարակի համայնքներին վերադարձվել է 12 հողատարածք

2026 թվականի առաջին կիսամյակում Լոռու մարզում պետությանը, համայնքներին և պետական ու համայնքային մասնակցությամբ կազմակերպություններին պատճառված վնասի վերականգնված գումարը կազմել է 82 մլն 480 հազար դրամ։ Այս մասին հայտնում է ՀՀ դատախազությունը։

Դատախազության միջնորդագրերի հիման վրա Վանաձոր համայնքին վերադարձվել է 9 հողամաս՝ 3530.45 քմ ընդհանուր մակերեսով և 37 մլն 117 հազար դրամ կադաստրային արժեքով։

Քրեական վարույթի շրջանակում վերականգնվել է նաև Գյուլագարակ համայնքի սեփականության իրավունքը 3 հողամասի նկատմամբ՝ 2.11588 հա ընդհանուր մակերեսով և 2 մլն 315 հազար դրամ կադաստրային արժեքով։

Դատախազության տվյալներով՝ 2026 թվականի առաջին կիսամյակում Լոռու մարզում դատարան է ուղարկվել 26 քրեական վարույթ՝ ծանր հանցագործությունների և 7 քրեական վարույթ՝ առանձնապես ծանր հանցագործությունների վերաբերյալ։ Նույն ժամանակահատվածում օրինական ուժի մեջ է մտել 8 մեղադրական դատավճիռ ծանր և 4 մեղադրական դատավճիռ՝ առանձնապես ծանր հանցագործությունների գործերով։