«Ուժեղ Հայաստանը» եվրոպական ինտեգրման հանձնաժողովի նախագահի պաշտոնում առաջադրել է Հարություն Հարությունյանին

«Ուժեղ Հայաստան» խմբակցությունն ԱԺ Եվրոպական ինտեգրման հարցերի մշտական հանձնաժողովի նախագահի պաշտոնում առաջադրել է Հարություն Հարությունյանի թեկնածությունը։ Նրան խորհրդարանում ներկայացրել է նույն խմբակցության պատգամավոր Արեգա Հովսեփյանը։

Հարություն Հարությունյանը ծնվել է 1986 թվականին Երևանում։ 2007 թվականին ավարտել է Հայաստանում ֆրանսիական համալսարանի իրավաբանության ֆակուլտետը, իսկ 2009 թվականին՝ նույն համալսարանի մագիստրատուրան։

2003-2007 թվականներին եղել է «Alliance Jeunesse» միության նախագահ, իսկ 2007-2008 թվականներին՝ Հայաստանում ֆրանսիական համալսարանի ուսանողական խորհրդի նախագահ։

2006-2007 թվականներին աշխատել է «Բաղրամյանի պոլիկլինիկա և մոր ու մանկան պահպանության կենտրոն» ՓԲԸ-ում՝ որպես իրավաբան։ 2008-2011 թվականներին եղել է ՀՀ վերաքննիչ քաղաքացիական դատարանի դատավորի օգնական։

2011 թվականից զբաղվում է փաստաբանական գործունեությամբ։ 2012 թվականից մինչև 2026 թվականի հուլիսի 29-ը եղել է «Իրավաբանական խորհրդատվական խումբ» ՍՊԸ-ի տնօրեն։ 2015-2024 թվականներին եղել է ՀՀ փաստաբանների պալատի խորհրդի անդամ։

2019-2022 թվականներին աշխատել է ՀՀ առողջապահության նախարարության «Ակադեմիկոս Ս. Ավդալբեկյանի անվան առողջապահության ազգային ինստիտուտ» ՓԲԸ-ում՝ որպես իրավաբան։ 2023-2024 թվականներին եղել է «Հայաստանի պետական հետաքրքրությունների ֆոնդ» ՓԲԸ-ի դատական գործերի պատասխանատու։

2021-2025 թվականներին եղել է ՀՀ դատավորների ընդհանուր ժողովի Էթիկայի և կարգապահական հարցերի հանձնաժողովի անդամ։ 2025 թվականին կրկին ընտրվել է նույն հանձնաժողովի ոչ դատավոր անդամ։