ԱՄՆ-ն պատրաստվում է Իրանի դեմ «պատմության ամենախիստ» պատժամիջոցներին․ Թեհրանը զգուշացնում է կոշտ պատասխանի մասին

ԱՄՆ-ն և Իրանը շարունակում են կոշտ հայտարարություններ փոխանակել՝ Վաշինգտոնի կողմից Իրանի դեմ նոր տնտեսական պատժամիջոցների հրապարակման նախաշեմին։ Ինչպես հայտնում է Reuters-ը, ԱՄՆ ֆինանսների նախարար Սքոթ Բեսենթը երկուշաբթի կներկայացնի միջոցներ, որոնք Վաշինգտոնն անվանում է Իրանի դեմ «պատմության ամենախիստ պատժամիջոցները»։ Դրանք կարող են անդրադառնալ նաև Իրանի խոշոր առևտրային գործընկերների, այդ թվում՝ Չինաստանի վրա։

Միաժամանակ Օրմուզի նեղուցով նավարկությունը կտրուկ նվազել է։ Պատերազմից առաջ այստեղով օրական անցնում էր ավելի քան 20 մլն բարել նավթ, մինչդեռ այժմ այդ ցուցանիշը շուրջ 8 մլն բարել է։ Իրանը շարունակում է սպառնալ հարվածել առանց թույլտվության նեղուցով անցնող նավթատարներին, սակայն բացառություն է արել իրաքյան մի շարք տանկերների համար։

Իրանի ԶՈւ գլխավոր շտաբի պետ Ալի Աբդոլահին հայտարարել է, որ ռազմական սպառնալիքներին Թեհրանը կպատասխանի «ջախջախիչ և կործանարար» հարվածներով։ Միևնույն ժամանակ նախագահ Մասուդ Փեզեշքիանը հանդես է եկել հակամարտությունը դիվանագիտական ճանապարհով ավարտելու օգտին։ Reuters-ի տվյալներով՝ գրեթե վեց ամիս շարունակվող պատերազմի պայմաններում ԱՄՆ-ի և Իրանի միջև ներկայում ակտիվ ռազմական գործողություններ չեն ընթանում, սակայն խաղաղ բանակցություններ նույնպես չեն վարվում։