Վարդանյան․ Փաշինյանի ելույթից հետո տեղի ունեցածը պատահականություն անվանել հնարավոր չէ

«Սա Ազգային ժողովի ամբիոնից հնչեցրած ուղիղ հրահանգի իրականացումն է։ Չեմ կարծում, որ Հայաստանում կա գոնե մեկ մարդ, այդ թվում՝ իշխանության կողմնակիցների շրջանում, որը տեղի ունեցողը կարող է այլ կերպ մեկնաբանել»,- լրագրողների հետ զրույցում հայտարարել է ԱԺ «Հայաստան» խմբակցության պատգամավոր Քրիստինե Վարդանյանը՝ անդրադառնալով պատգամավոր Լևոն Քոչարյանի բնակարանում իրականացվող խուզարկությանը և ՀՀ երկրորդ նախագահ Ռոբերտ Քոչարյանի՝ Հակակոռուպցիոն կոմիտե տեղափոխվելուն։

Վարդանյանի խոսքով՝ Լևոն Քոչարյանը, իշխանություններին հասցեագրված իր կոշտ քաղաքական գնահատականները հնչեցնելով, գիտակցում էր, թե ինչ հետևանքներ կարող են ունենալ դրանք։

Նշենք, որ նախորդ օրը խորհրդարանում կառավարության ծրագրի քննարկման ժամանակ Լևոն Քոչարյանը քննադատել էր վարչապետ Նիկոլ Փաշինյանի հայտարարությունները՝ դրանք որակելով որպես քաղաքական պատվերի դրսևորում։ Նրա գնահատմամբ՝ իշխանությունը բացահայտ ճնշումներ է գործադրում քաղաքական ընդդիմախոսների նկատմամբ, ինչը հակասում է ժողովրդավարական և եվրոպական արժեքներին։

Ի պատասխան՝ վարչապետ Նիկոլ Փաշինյանը հայտարարել էր, որ իր համար քաղաքական առաջնահերթություն է անօրինական ճանապարհով ձեռք բերված կարողությունների վերադարձը պետությանը։ Փաշինյանի խոսքով՝ որևէ մեկը չի կարող պահպանել և սերունդներին փոխանցել այն հարստությունը, որը, իր համոզմամբ, ձևավորվել է ժողովրդի հաշվին, և պետությունը հետևողականորեն հետամուտ է լինելու այդ գույքի վերադարձին։

Վարչապետը շեշտել էր, որ խոսքը անձնական հարաբերությունների մասին չէ, այլ քաղաքական պարտավորության, որը, իր խոսքով, ստանձնել է հանրության առաջ։