Խորհրդարանական ընդդիմությունը բոյկոտել է Հայաստանի Ազգային ժողովի նիստը

Ազգային ժողովի օգոստոսի 25-ի նիստը բոյկոտել են ընդդիմադիր «Ուժեղ Հայաստան» և «Հայաստան» խմբակցությունները։

Նախորդ օրը «Ուժեղ Հայաստան» խմբակցության պատգամավորները լքել էին նիստերի դահլիճը՝ պատճառաբանելով, որ վարչապետ Նիկոլ Փաշինյանի և իշխող «Քաղաքացիական պայմանագիր» խմբակցության ներկայացուցիչների վարքագիծն անընդունելի է եղել։

Լարված իրավիճակ էր ստեղծվել կառավարության ծրագրի քննարկման ընթացքում, երբ վարչապետը, անդրադառնալով Ամենայն հայոց կաթողիկոս Գարեգին Բ-ին, մի քանի անգամ օգտագործել էր նրա աշխարհիկ անունը։ Ընդդիմադիր պատգամավորները դա գնահատել էին որպես Հայ Առաքելական եկեղեցու առաջնորդի նկատմամբ անհարգալից վերաբերմունք և բողոքի նշանով սկսել էին հարվածել սեղաններին։ Դահլիճում ծավալված վիճաբանությունից հետո «Ուժեղ Հայաստան» խմբակցության պատգամավորները հեռացել էին նիստից։

Միաժամանակ, առավոտյան Հակակոռուպցիոն կոմիտեն տեղեկացրել էր, որ կոռուպցիոն բնույթի գործի շրջանակում մի շարք հասցեներում իրականացվում են խուզարկություններ և այլ վարութային գործողություններ։ Դրանց թվում էին նաև ՀՀ երկրորդ նախագահ Ռոբերտ Քոչարյանի և ԱԺ «Հայաստան» խմբակցության պատգամավոր Լևոն Քոչարյանի բնակարանները։ Ավելի ուշ հայտնի դարձավ, որ Ռոբերտ Քոչարյանը և նրա որդի Սեդրակ Քոչարյանը ձերբակալվել են։

Հիշեցնենք, որ մեկ օր առաջ խորհրդարանում կոշտ բանավեճ էր տեղի ունեցել Լևոն Քոչարյանի և վարչապետ Նիկոլ Փաշինյանի միջև։ Քննարկման ընթացքում վարչապետը հայտարարել էր, որ անօրինական ճանապարհով ձեռք բերված գույքը պետք է վերադարձվի պետությանը՝ ընդգծելով, որ նման ունեցվածքը չի կարող փոխանցվել սերունդներին։ Ընդդիմությունն այդ հայտարարությունները որակել էր որպես քաղաքական ճնշման դրսևորում։