Լուկաշենկոն խոսել է ռուս-բելառուսական «Օսվեյ» ինքնաթիռի նախագծի շուրջ տարաձայնությունների մասին

Ռուսաստանի և Բելառուսի համատեղ «Օսվեյ» ինքնաթիռի նախագծի շուրջ որոշ տարաձայնություններ կան, որոնք անհրաժեշտ է քննարկել։ Այս մասին ՌԴ առաջին փոխվարչապետ Դենիս Մանտուրովի հետ հանդիպման ժամանակ հայտարարել է Բելառուսի նախագահ Ալեքսանդր Լուկաշենկոն, հայտնում է ԲԵԼՏԱ-ն։

Լուկաշենկոն չի հստակեցրել, թե կոնկրետ ինչ խնդիրների մասին է խոսքը։ Նա նշել է, որ կողմերը պատրաստվում են քննարկել դրանք, որպեսզի նախագիծն իրականացվի։ Բելառուսի նախագահի խոսքով՝ «Օսվեյը» անհրաժեշտ է ընդհանուր շուկային․ Ռուսաստանը կստանա նոր ինքնաթիռ, իսկ Բելառուսը՝ ավիաշինության ոլորտում նոր փորձ և հնարավորություններ։

Ավելի վաղ Մանտուրովը հայտնել էր, որ «Օսվեյի» փորձնական օրինակը նախատեսվում է պատրաստել 2027 թվականին, երբ պետք է սկսվի նաև դրա հավաստագրման գործընթացը։ Այն նախատեսվում է ավարտել 2029 թվականին։ Ինքնաթիռը նախատեսված է տեղական և տարածաշրջանային չվերթների համար և կարող է տեղափոխել մինչև 19 ուղևոր կամ 1,8 տոննա բեռ։