Մահացել է քանթրի երաժշտության լեգենդ Դոլլի Փարթոնը

80 տարեկանում մահացել է ամերիկացի երգչուհի, դերասանուհի և քանթրի երաժշտության պատմության մեջ ամենահայտնի կատարողներից մեկը՝ Դոլի Փարթոնը։ Երգչուհու Instagram-ի էջում հրապարակված տեսանյութում այդ մասին հայտնել է նրա եղբորորդին՝ Բրայան Սիվերը։ Մահվան պաշտոնական պատճառը չի հաղորդվում։

«Այսօր, ներկայացնելով Փարթոն և Օուենս ընտանիքները, հայտարարում եմ իմ հորաքույր Դոլի Ռեբեկա Փարթոն Դինի մահվան մասին, որը մի սերնդի համար Սիս ու Գրեննի քույր էր, իսկ հաջորդի համար՝ Ջիջի», — ասել է Սիվերը։

Նրա խոսքով՝ Փարթոնը տարիներ առաջ անձամբ է իրեն խնդրել նմանատիպ հայտարարություն անել։ Նա նշել է, որ ավելի քան 20 տարի ղեկավարել է երգչուհու անվտանգության ծառայությունը, իսկ մինչ այդ այդ աշխատանքը կատարել է իր հայրը։

Ինչպես հաղորդում է NBC News-ը, երգչուհու մահը վրա է հասել առողջական խնդիրների պատճառով։ Մայիսին Փարթոնը հայտնել էր Լաս Վեգասում նախատեսված ելույթի չեղարկման մասին և պատմել, որ մի քանի տարի բուժվել է երիկամների քարերից։ Նա նաև խոսել էր իմունային և մարսողական համակարգերի խնդիրների մասին։

Ուրբաթ օրը Փարթոնը խոստովանել էր, որ 2025 թվականի մարտին ամուսնու՝ Քարլ Դինի մահից հետո իր էներգիան գնալով նվազում է, սակայն ընդգծել էր, որ չի պատրաստվում հեռանալ բեմից։

Ավելի քան 60-ամյա կարիերայի ընթացքում Փարթոնը վաճառել է 100 միլիոնից ավելի ձայնասկավառակ և արժանացել 11 «Գրեմմի» մրցանակի։ Նա համաշխարհային ճանաչում է ձեռք բերել այնպիսի երգերով, ինչպիսիք են «Jolene»-ը և «I Will Always Love You»-ն։ Վերջինս հետագայում նոր հնչողություն ու համաշխարհային փառք է ստացել Ուիթնի Հյուսթոնի կատարմամբ։

Փարթոնը հաջողության է հասել նաև կինոյում՝ նկարահանվելով «Իննից հինգը», «Պողպատե մագնոլիաներ» և «Տեխասի լավագույն փոքրիկ հասարակաց տունը» ֆիլմերում։ 1984 թվականին նա աստղ է ստացել Հոլիվուդի փառքի ծառուղում։

Երգչուհին մեծացել է Թենեսի նահանգի աղքատ բազմազավակ ընտանիքում և հայտնի է եղել նաև իր բարեգործական գործունեությամբ։ Նա հիմնադրել է Dollywood Foundation հիմնադրամը և Imagination Library ծրագիրը, որն անվճար գրքեր է ուղարկում երեխաներին։ Գոյության երեք տասնամյակի ընթացքում ծրագիրն ավելի քան 300 միլիոն գիրք է վաճառել ԱՄՆ-ում, Կանադայում, Ավստրալիայում, Մեծ Բրիտանիայում և Իրլանդիայում։

Փարթոնը նաև 1 միլիոն դոլար է նվիրաբերել Վանդերբիլտի համալսարանին՝ կորոնավիրուսի հետազոտման համար։ Այդ հետազոտությունները հետագայում իրենց ավանդն են ունեցել Moderna պատվաստանյութի մշակման գործում։

Երգչուհին ծնվել է 1946 թվականի հունվարի 19-ին Թենեսիի Լիթլ Փիջն գետի ափին գտնվող փոքրիկ տնակում և 12 երեխա ունեցող ընտանիքի չորրորդ երեխան է եղել։ Արդեն 13 տարեկանում նա ելույթ է ունեցել տեղական ռադիոյով և հեռուստատեսությամբ, իսկ դպրոցն ավարտելուց կարճ ժամանակ անց տեղափոխվել է Նեշվիլ, որտեղ սկսել էր երգահանի կարիերան։

1967 թվականին Փարթոնը թողարկել է իր առաջին ալբոմը, իսկ 1974 թվականին «Jolene» երգով առաջին անգամ գլխավորել է քանթրի-չարթերը։ 1986 թվականին նա իր ծննդավայրից ոչ հեռու բացել է Dollywood թեմատիկ այգին։