Ձերբակալվել է Ճամբարակի զորամասի շտաբի պետը․ զինվորներին պատժելու համար ստիպել էր վազել ճանապարհին

Ճամբարակից Վահան գյուղ տանող ճանապարհին 7 զինծառայողների վրաերթի ենթարկելու դեպքի շրջանակում ձերբակալվել է ՊՆ զորամասերից մեկի գումարտակի շտաբի պետը։ Այս մասին հայտնում է ArmLur.am-ը՝ ներկայացնելով բացառիկ մանրամասներ։

Ըստ աղբյուրի՝ նախաքննությամբ պարզվել է, որ զինծառայողները ուշ երեկոյան այդ ճանապարհին վազել են զորամասի գումարտակի շտաբի պետի նշանակած պատժի հետևանքով։ Զինվորները զորամասի ճաշարանում բարձր խոսել են, ինչից հետո շտաբի պետը նրանց պատժելու նպատակով որոշել է ստիպել վազել Ճամբարակից դեպի Վահան տանող ճանապարհին։

ArmLur.am-ի տեղեկություններով՝ իրավապահները պարզել են, որ զինվորներին նման եղանակով պատժելը բանակային կանոնակարգով նախատեսված չէ։ Ավելին՝ շտաբի պետը, ըստ նախաքննության տվյալների, չի ապահովել զինծառայողների անվտանգությունը։ Դեպքի հետևանքով 7 զինվոր վրաերթի է ենթարկվել, որոնցից մեկը՝ 2007 թվականին ծնված Ս. Վարդանյանը, մահացել է։

Դեպքից անմիջապես հետո ձերբակալվել էր նաև «Գազ-53» բեռնատարի վարորդը՝ Վահան գյուղի բնակիչ Վահան Ճաղարյանը։ Իրավապահները պարզել էին, որ մեքենան շահագործման համար պիտանի չի եղել, իսկ վարորդը վարորդական վկայական չի ունեցել։ Ներկայում իրավապահները չեն բացառում շտաբի պետին կալանավորելու վերաբերյալ դատարան միջնորդություն ներկայացնելը։