Պենտագոնը պատրաստում է Եվրոպայում ամերիկյան զորքերի տեղակայման վերանայման մի քանի տարբերակ

Պենտագոնը մինչև նոյեմբերի 6-ը ԱՄՆ պաշտպանության նախարար Փիթ Հեգսեթին կներկայացնի Եվրոպայում ամերիկյան զորքերի տեղակայման վերաբերյալ առնվազն չորս տարբերակ։ Այս մասին հայտնում է Reuters-ը՝ հղում անելով իր տրամադրության տակ հայտնված փաստաթղթին։

Ներկայում Եվրոպայում տեղակայված է շուրջ 80 հազար ամերիկացի զինծառայող։ ՆԱՏՕ-ի եվրոպական անդամները մտավախություն ունեն, որ վեցամսյա վերանայման արդյունքում Վաշինգտոնը կարող է զգալիորեն կրճատել իր ռազմական ներկայությունը մայրցամաքում։ Քննարկվող տարբերակներում հաշվի կառնվեն զորքերի թվաքանակը, տեղակայման վայրերը, հնարավոր փոփոխությունների իրականացման արագությունն ու դրանց ծախսերը։

Փաստաթղթի համաձայն՝ ՆԱՏՕ-ի դաշնակիցները գնահատվելու են նաև պաշտպանական ծախսերի վերաբերյալ ստանձնած պարտավորությունների կատարման, ամերիկյան ուժերին ռազմաբազաներից օգտվելու և օդային տարածքով անցնելու հնարավորությունների, ինչպես նաև հետախուզական, կիբերանվտանգության և տիեզերական ենթակառուցվածքների հասանելիության տեսանկյունից։ Թրամփի վարչակազմը բազմիցս հայտարարել է, որ եվրոպական դաշնակիցները պետք է ավելի մեծ պատասխանատվություն ստանձնեն սեփական պաշտպանության համար, մինչդեռ ԱՄՆ-ի աջակցությունը պետք է դառնա ավելի սահմանափակ։