«Մեզ էլ թող տանեն Հանրապետության հրապարակում կախաղան հանեն»․ Փաշինյանը՝ Քոչարյանի գործի մասին

«Ես մեկընդմիշտ հայտարարել եմ՝ եթե Հայաստանի Հանրապետության քաղաքացիները համարում են, որ սխալ է տեղի ունենում, և պետք է ինձ կանգնեցնեն, իրենք իրավունք ունեն հեղափոխություն անելու»,- հայտարարեց վարչապետ Նիկոլ Փաշինյանը՝ արձագանքելով դիտարկմանը, որ Ռոբերտ Քոչարյանին առաջադրված մեղադրանքը վաղեմության ժամկետի խնդիր ունի։

Լրագրողը նաև հարցրեց, թե եթե, ինչպես պնդվում է, Փաշինյանը հրահանգներ է տալիս, իսկ իրավապահները դրանք կատարում են, ապա ինչու են պետական բյուջեից մեծ միջոցներ հատկացվում ուժային կառույցների պահպանմանն ու համակարգի գործունեությանը։

Շարունակելով իր միտքը՝ Փաշինյանը հայտարարեց, որ եթե քաղաքացիները կարծում են, թե պետք է պաշտպանեն Ռոբերտ Քոչարյանի, Գագիկ Ծառուկյանի, Սերժ Սարգսյանի, Սամվել Կարապետյանի և այլ գործիչների շահերն ու ունեցվածքը, կարող են իրենց դիրքորոշումը արտահայտել փողոցում։

«Թող հանուն Ռոբերտ Քոչարյանի ունեցվածքի, Գագիկ Ծառուկյանի և մյուսների, Կալուգացի օլիգարխի ու Սերժ Սարգսյանի վաստակի համար ՀՀ քաղաքացիները, եթե համարում են, որ պետք է պաշտպանեն իրենց ազնիվ վաստակը, դուրս գան փողոց և պաշտպանեն»,- ասաց վարչապետը։

Փաշինյանը նաև հայտարարեց, որ այդ դեպքում քաղաքացիները կարող են իշխանությունից հեռացնել գործող կառավարությանը և իրենց նախընտրած նախկին կամ այլ քաղաքական ուժերին վերադարձնել իշխանության։

«Ամենայն հարգանքով և լրջությամբ եմ ասում՝ մեզ էլ հեղափոխությամբ հեռացնեն և բերեն իրենց սիրելի և ազնվագույն, իրենց սիրելի Ռոբերտ Քոչարյանին, Սերժ Սարգսյանին, Սամվել Կարապետյանին, Գագիկ Ծառուկյանին և տեղավորեն էս կառավարման շենքերում, մեզ էլ թող տանեն Հանրապետության հրապարակում կախաղան հանեն»,- ասաց Փաշինյանը։