Ատամ չէին՝ պրոթեզ էին, այդ պրոթեզը ես եմ հանել»․ Փաշինյանը՝ Ալիևի «ատամները քաշելու» մասին

«Մենք այդ քարտեզներին բանակցությունների արդյունքում չենք հասել, դրանք բանակցությունների առարկա չեն եղել»,- կառավարության ճեպազրույցների սրահում հայտարարեց վարչապետ Նիկոլ Փաշինյանը՝ պատասխանելով հարցին, թե ինչու է սահմանազատման հիմք ընտրվել 1975 թվականի ԽՍՀՄ ԶՈւ ԳՇ քարտեզը, այլ ոչ թե 1988 թվականին Հայաստանի և Ադրբեջանի միջև հաստատված քարտեզը, որտեղ Տիգրանաշենը մեծ մասամբ ներկայացված է որպես Հայաստանի տարածք։

Փաշինյանի խոսքով՝ Պրահայում միմյանց տարածքային ամբողջականությունը ճանաչելուց հետո կողմերի խնդիրն է եղել պարզել, թե Խորհրդային Միության փլուզման պահին որ քարտեզներն են ունեցել իրավական ուժ։

Անդրադառնալով «Քյարքիի» թեմային՝ Փաշինյանը լրագրողին հարցրեց, թե որտեղից է նա ենթադրում, որ «Քյարքի» ասելով ինքը նկատի ունի տարածքի մեծ մասը, այլ ոչ թե փոքր մասը։

«Հարց է՝ Ադրբեջանն էլ, մենք էլ ուզո՞ւմ ենք անկլավ, էքսկլավ ունենալ։ Դա մեր կյանքը բարդացնո՞ւմ է, թե՞ հեշտացնում։ Սա էլ մտածելու հարց է։ Եթե երկկողմանի գալիս ենք այն եզրակացության, որ դա մեր կյանքը բարդացնում է, ուրեմն պետք է երկկողմ լուծումներ գտնենք»,- ասաց վարչապետը։

Նա նաև պնդեց, որ Հայաստանի և Ադրբեջանի միջև կա պարտադիր իրավական ուժ ունեցող փաստաթուղթ, որով ամրագրված է, որ Ալմա-Աթայի հռչակագիրը սահմանազատման գործընթացի բազային սկզբունքն է։

«Մենք ունենք նախաստորագրված խաղաղության համաձայնագիր, որտեղ, հիմնվելով Ալմա-Աթայի հռչակագրի վրա և ճանաչելով նախկին Խորհրդային Միության սահմանները, այդ հենքի վրա ճանաչում ենք միմյանց ինքնիշխանությունը, տարածքային ամբողջականությունը և քաղաքական անկախությունը»,- նշեց Փաշինյանը։

Լրագրողի դիտարկմանը, թե «Քյարքի» ասելով Փաշինյանը, իր խոսքով, «ատամի նյարդն է հանում», մինչդեռ Ադրբեջանի նախագահ Իլհամ Ալիևը Հայաստանից «բոլոր ատամներն է քաշում», վարչապետը պատասխանեց՝ օգտագործելով ատամնաբուժական համեմատությունը։

«Ինչ վերաբերում է ատամներին, դա իրականում պրոթեզ է եղել։ Ես «իրական Հայաստանի» գաղափարախոսությամբ հենց դա եմ ուզում բացատրել։ Չեմ ուզում որևէ մեկին նեղացնել, բայց որոշ կազմակերպություններ և գործընկերություններ, որոնք իբր մեր անվտանգությունը երաշխավորում էին և տարածաշրջանում մեզ իբր ուժեղի դիրքերում էին դնում, ատամ չէին՝ պրոթեզ էին։ Այդ պրոթեզը ես եմ հանել»,- ասաց Փաշինյանը։

Նրա խոսքով՝ այդ «պրոթեզի» տակ, սակայն, կան չբուժված խնդիրներ։

«Այդ պրոթեզի տակ կան փչացած ատամներ, որոնց նյարդերը հանած չեն, ցավում են, և այդ ատամների բուժմամբ եմ ես զբաղված։ Այսօր լրիվ «ատամնաբուժ Արևելյան» արեցինք»,- եզրափակեց Փաշինյանը։