ԱՄՆ պաշտպանության նախարարը բանակի նախարարին փոխարինող է փնտրում

ԱՄՆ պաշտպանության նախարար Փիթ Հեգսեթը իր մամուլի քարտուղար Շոն Փարնելին դիտարկում է՝ որպես բանակի նախարար Դեն Դրիսկոլի հնարավոր իրավահաջորդ, ով, ինչպես սպասվում է, կհեռանա իր պաշտոնից մինչև 2026 թվականի վերջը: Այս մասին հաղորդում է The Hill-ը՝ հղում անելով աղբյուրներին։

Ըստ ամերիկյան լրատվամիջոցների՝ վերջին ամիսներին Հեգսեթի և Դրիսկոլի միջև լուրջ տարաձայնություններ են առաջացել: Ապրիլին Դրիսկոլը հրապարակավ հայտարարել էր, որ հրաժարական տալու մտադրություն չունի, սակայն ավելի ուշ աղբյուրները հայտնել են նրա՝  մինչև տարեվերջ հնարավոր հեռանալու մասին։

Շոն Փարնելը ԱՄՆ բանակի նախկին կապիտան է և Աֆղանստանի պատերազմի վետերան: 2025 թվականի փետրվարից նա ծառայել է որպես պաշտպանության նախարարի հասարակայնության հետ կապերի գծով օգնական և Հեգսեթի ամենամտերիմ դաշնակիցներից մեկն է: Ըստ տեղեկությունների՝ Փարնելն արդեն հետաքրքրություն է հայտնել բանակի նախարար դառնալու հարցում, եթե պաշտոնը թափուր մնա: