Քոչարյանը կալանավորված է, իսկ Փաշինյանը խուսափում է ժողովրդին ընտրության հնարավորություն տալուց. Լավրով

«Մեր Արտաքին գործերի նախարարության դիրքորոշումն այն է, որ մենք գործում ենք հայ ժողովրդի շահերից ելնելով»,- RBC-ին տված հարցազրույցում հայտարարել է ՌԴ արտգործնախարար Սերգեյ Լավրովը՝ անդրադառնալով ՀՀ երկրորդ նախագահ Ռոբերտ Քոչարյանի կալանքին։

Լավրովը նաև նշել է, որ ՀՀ երրորդ նախագահ Սերժ Սարգսյանը ևս գտնվում է հետաքննության տակ։

«Մենք տեսնում ենք, թե ինչպես են հայ ժողովրդի շահերը դարեր շարունակ միահյուսված եղել մեր ժողովրդի շահերի հետ։ Շատ տարիներ մենք եղել ենք միասին և համերաշխ։ Ռուսաստանը բազմիցս աջակցել ու փրկել է հայ ժողովրդին և Հայաստանի ղեկավարությանը բարդ իրավիճակներում։ Հենց այդ շահերն էլ, բնականաբար, պետք է գերակշռեն։

Սակայն այժմ Երևանի ներկայիս ղեկավարությունը առաջնորդվում է այլ նպատակներով։ Հայտարարվել է Եվրոպական Միությանն ուղղված քաղաքական կուրս, և արդեն ընդունվել է օրենք, որը նախատեսում է սկսել Եվրամիությանը միանալու գործընթացը։

Մայիսին կայացած գագաթնաժողովի ընթացքում Եվրասիական տնտեսական միության անդամ երկրները հայտարարություն տարածեցին՝ կոչ անելով Հայաստանի ղեկավարությանը հանրաքվե անցկացնել և պարզել՝ քաղաքացիները ցանկանում են միանալ Եվրամիությանը, թե շարունակել մնալ Եվրասիական տնտեսական միության կազմում։ Իմ կարծիքով՝ դա լիովին արդարացված պահանջ է, քանի որ մեկ կազմակերպության նորմերը անհամատեղելի են մյուսի նորմերի հետ, և այդ մասին բազմիցս խոսվել է։

Սակայն Հայաստանի վարչապետ Նիկոլ Փաշինյանը հայտարարել է. «Երբ ժամանակը գա, այդ ժամանակ կորոշեմ»։ Բայց ի՞նչ է նշանակում «երբ ժամանակը գա», եթե արդեն ընդունվել է օրենք Հայաստանի՝ Եվրամիությանը միանալու գործընթաց սկսելու մասին։

Վերջերս կարդացի նաև Փաշինյանի հայտարարությունը, ըստ որի՝ հանրաքվեի հարցը կարող է քննարկվել միայն այն դեպքում, երբ Եվրամիությանը ներկայացվի անդամակցության հայտը, ստացվի պատասխան և մշակվի անդամակցության «ճանապարհային քարտեզը»։ Միայն դրանից հետո, նրա խոսքով, կարող է անցկացվել հանրաքվե։

Իմ կարծիքով՝ նման մոտեցումը չի վկայում հայ ընտրողների և հայ ժողովրդի նկատմամբ մեծ վստահության մասին։ Հենց ժողովրդին պետք է ներկայացվի ազնիվ ընտրություն՝ ինչի միջև է կատարվում ընտրությունը, ինչ հետևանքներ կարող է ունենալ Եվրամիությանը միանալը, և ինչ արդյունքներ է երկիրն ունեցել ներկայիս պայմաններում, երբ վերջին երեք տարիներին առևտրաշրջանառությունը գերազանցել է 6 միլիարդ դոլարը, իսկ մեկ տարվա ընթացքում հասել է 12 միլիարդ դոլարի։ Ըստ Լավրովի՝ Հայաստանը զարգացում է արձանագրել նաև Եվրասիական տնտեսական միության շրջանակում»։