Եթե Սարկոզին չհապաղեր ստորագրել, նման զարգացումներ չէին լինի. Կիրո Մանոյան

Ցեղասպանությունների ժխտումը քրեականացնող օրինագիծը չէր հասնի Ֆրանսիայի Սահմանադրական խորհուրդ, եթե նախագահ Նիկոլա Սարկոզին չհապաղեր ստորագրել արդեն իսկ Սենատի կողմից հաստատված օրինագիծը։ Այսօր լրագրողների հետ հանդիպման ժամանակ նման կարծիք հայտնեց Հայ Դատի գրասենյակի պատասխանատու Կիրո Մանոյանը։

Մանոյանը, համենայն դեպս, որևէ անլուծելի բան կամ անակնկալ չի տեսնում օրենքի՝ Սահմանադրական խորհրդում քննարկվելու մեջ, քանի որ և´ Ազգային Ժողովում, և´ Սենատում եղել են բավական թվով դեմ քվեարկած պատգամավորներ, և նրանք ընդամենն օգտագործել են օրինագծի սահմանադրականությունը վիճարկելու իրենց իրավունքը։

«Անշուշտ, այսպիսի զարգացման մեջ Թուրքիան էլ իր դերն ունեցավ, ԱՄՆ պետքարտուղար Հիլարի Քլինթոնի արձագանքը ևս կարևոր էր, Սարկոզիի կուսակցության մեջ էլ հաստատ կան մարդիկ, որոնք ամբողջությամբ հավանություն չեն տալիս նրա քաղաքականությանը և ստորագրել էին դիմումը, սակայն չի կարելի միանշանակ ասել, որ այս ամենը Ֆրանսիայի կողմից բեմադրված խաղ էր, քանի որ սեղանին մեծ խաղադրույքներ են դրված։ Եթե Սարկոզին ստորագրեր՝ օրինագիծը Սահմանադրական խորհուրդ չէր հասնի, բայց դա չի նշանակում, թե այն այլևս չէր վիճարկվի»,-ասաց Կիրո Մանոյանը։

Հայ դատի գրասենյակների պատասխանատուն նշեց, որ թեև Սահմանադրական խորհուրդը բոլորովին այլ կարգի կառույց է և դժվար է այնտեղ օգտագործել անձնական կապերն ու լոբբինգի միջոցները, սակայն ֆրանսահայությունն ամեն ինչ անում է, որ Խորհուրդը ճիշտ որոշում կայացնի։