Սահմանադրական խորհուրդը կարող է երեք եզրակացություն տալ. Կիրո Մանոյան

Ֆրանսիայում ցեղասպանությունների ժխտումը քրեականացնող օրինագծի վերաբերյալ Սահմանադրական խորհուրդը կարող է կայացնել երեք եզրակացություն՝ ամբողջովին համապատասխանում է ֆրանսիայի Սահմանադրությանը, մասամբ չի համապատասխանում Սահմանադրությանը և ամբողջովին հակասահմանադրական է։

ՀՅԴ Հայ Դատի և քաղաքական հարցերով գրասենյակի պատասխանատու Կիրո Մանոյանը երեք եզրակացություններն էլ հավասարապես հավանական է համարում և յուրաքանչյուրի դեպքում հավանական շարունակության մասին այսօր խոսեց լրագրողների հետ։

«Եթե Սահմանադրական խորհուրդը դրական եզրակացություն տա՝ Սարկոզին կստորագրի օրինագիծը, և այն այլևս բողոքարկման ենթակա չի լինի։ մասամբ Սահմանադրությանն անհամապատասխան ճանաչվելու դեպքում օրինագիծը կվերադարձվի խորհրդարան՝ շտկումների համար, իսկ հակասահմանադրական ճանաչվելու դեպքում Սարկոզին խոստացել է անմիջապես նոր օրինագիծ ներկայացնել։ Սակայն աշխարհի վերջը չի լինի, եթե անգամ հակասահմանադրական ճանաչվի, քանի որ օրինագիծը բառեր են, և բառերը փոխելով՝ կարելի է համապատասխանեցնել։ Ուղղակի գործընթացը կձգձգվի, իսկ Սարկոզին ցանկանում էր ամեն ինչ արագ անել՝ մինչև նախագահական ընտրությունները»,-ասաց Մանոյանը։

Մտահոգիչ է այն հանգամանքը, որ օրինագծի ընդդիամդիրները փորձում են Սահմանադրական խորհրդին համոզել, որ հարցը հրատապ է, և եզրակացությունը պետք է կայացնել ոչ թե սահմանված մեկ ամսում, այլ հնարավորինս շուտ։ Մանոյանը դա բացատրեց ընդդիմացողների մտահոգությամբ, որ երկար ժամանակ ունենալու դեպքում օրինագծի կողմնակիցները կկարողանան կիրառել իրենց լծակները՝ Խորհրդից իրենց հարմար որոշումն ստանալու համար։ Մինչև ընտրությունները օրինագծի ճակատագիրը պարզ կլինի միայն Խորհրդի կողմից սահմանադրական ճանաչվելու դեպքում, քանի որ մյուս երկու դեպքերում պարզապես ժամանակային առումով հնարավոր չի լինի վերջնական որոշում ակնկալել։

Նա ասաց նաև, որ Սենատի հաստատումից հետո բուռն արձագանք ցուցաբերած պաշտոնական Երևանն այժմ լռում է, որովհետև չէր կանխատեսում դեպքերի նման զարգացում և չգիտի ինչ անել։ «Իշխանությունները փորձեցին Սենատի որոշումը ներկայացնել որպես իրենց ճիշտ քաղաքականության արդյունք։ Իհարկե, չի կարելի զրոյացնել իշխանությունների դերակատարումը, սակայն նրանց վերագրելն էլ սխալ է։ Բացի այդ, եթե հաստատումը իրենց քաղաքականության հաղթանակն էր, ապա այս զարգացումներն էլ են դրա արդյունքը»։

Կիրո Մանոյանն իրազեկեց, որ այսօր Սարկոզին հանդիպելու է Ֆրանսիայի հայ համայնքի հետ, և ամենայն հավանականությամբ չի շրջանցի օրինագծին վերաբերող հարցերը։ 

«Կարևորն այն է, որ ցանկացած ելքի պատրաստ լինենք և չհիասթափվենք, այլ շարունակենք պայքարել, որովհետև թուրքական թերթերից մեկի խմբագիրն անգամ գրել էր, որ օրենքի մերժվելն անգամ էական բան չի փոխելու»,-ամփոփեց Կիրո Մանոյանը։