Պուտինը և Ռուսաստանի հայերի «կինոն»

Փետրվարի 6-ին տեղի է ունեցել Ռուսաստանի նախագահի թեկնածու Վլադիմիր Պուտինի նախընտրական շտաբի ղեկավար Ստանիսլավ Գովորուխինի և Ռուսաստանի հայերի բարեկամության խորհրդի ներկայացուցիչների հանդիպումը, որին ներկա են եղել Ռուսաստանի հայերի միության նախագահ Արա Աբրահամյանը, հայտնի բևեռախույզ Արթուր Չիլինգարովը և հայտնի գործարար Միխայիլ Բաղդասարովը։

Հանդիպման ժամանակ ցուցադրված ֆիլմում Ռուսաստանի հայերի բարեկամության խորհուրդը ՌԴ նախագահական ընտրություններում իր աջակցությունն է հայտնում թեկնածու Վլադիմիր Պուտինին։ Ֆիլմում ներկայացված են Հայաստանի մի շարք քաղաքական գործիչներ, այդ թվում՝ Սերժ Սարգսյանը և Ռոբերտ Քոչարյանը։  

Հանդիպման նախաձեռնողները հայտնել են, որ Ռուսաստանի հայերի 99.9%–ը աջակցում են Վլադիմիր Պուտինին։

Սակայն, ըստ Regnum–ի, ցուցադրված ֆիլմում Քոչարյանի և Սարգսյանի հարաբերությունները «պոզիտիվ» տեսանկյունից են ներկայացվում, և հոդվածագիրը նշում է, որ այս քայլով Միխայիլ Բաղդասարովը պարարտ հող է ստեղծում Պուտինի և Հայասատանի երկու նախագահների միջև վստահությունը բարձրացնելու առումով, և ցուցադրված ֆիլմը կարող է ազդակ լինել հենց այդ նպատակի իրականացման տեսանկյունից։ 

Ռուսաստանի նախագահի թեկնածու Վլադիմիր Պուտինի կողմից այդ ֆիլմի վերաբերյալ որևէ արձագանք դեռևս չի եղել։