Մանվել Գրիգորյան. Ես միշտ հպարտացել եմ գյումրեցի իմ մարտընկերներով

ՀՀ ԵԿՄ վարչության նախագահ, Արցախի հերոս, Գեներալ-լեյտենանտ Մ. Ս. Գրիգորյանը շնորհավորել է Գյումրի քաղաքի հիմնադրման օրը.

Հարգելի գյումրեցիներ,

Հայաստանի Հանրապետության Երկրապահ կամավորականների միության , Հանրապետության բոլոր երկրապահ կամավորականների,

5-րդ բրիգադի մարտիկների, երիտասարդ ու պատանի երկրապահների և անձամբ իմ անունից շնորհավորում եմ Գյումրի քաղաքի հիմնադրման տոնի առթիվ:

Հայ ժողովրդի դարավոր պատմության քառուղիներով անցած և մեր օրերը հասած Գյումրի քաղաքն իր յուրահատուկ դերակատարումն ունի մեր ազգապահպանման ու նվաճումների գործընթացի մեջ:

21-րդ դար թևակոխած Գյումրի քաղաքը, հաղթահարելով բոլոր ժամանակների դժվարություններն ու բնական արհավիրքները, այսօր դարձել է Հանրապետության գեղեցիկ քաղաքներից մեկը շնորհիվ գյումրեցիների համառ կամքի և դեպի գալիքը միտված նպատակասլացության:

Երկրաշարժի արհավիրքները դեռ չհաղթահարած գյումրեցին կանգնեց արցախահայության թիկունքին ու մարտնչեց խիզախորեն:

Ինձ բախտ է վիճակվել մարտադաշտում տեսնել Շիրակի դաշտավայրի քաջարի երկրապահ կամավորականների, հատկապես' գյումրեցիների հերոսականությունը: Յուրաքանչյուր գյումրեցի երկրապահ Արցախը պաշտպանելիս գիտակցում էր, որ պաշտպանում է Գյումրին, պաշտպանում է իր տունը, իր հարազատներին:

Ես միշտ հպարտացել եմ գյումրեցի իմ մարտընկերներով: Փառք Ձեզ հարգելի մարտական ընկերներ: Փառք ՀՀ սահմանների պաշտպանության և Արցախի անկախության համար զոհված մեր մարտական ընկերներին, փառք հերոսներ ծնած մեր հերոս մայրերին:

Հարգանքներով՝

ՀՀ ԵԿՄ վարչության նախագահ,

Արցախի հերոս,

Գեներալ-լեյտենանտ Մ. Ս. Գրիգորյան