Երևանի քաղաքապետի ոսկե մեդալ՝ Վլադիսլավ Տրետյակին

Երևանի քաղաքապետ Տարոն Մարգարյանը հյուրընկալել է «Էրեբունի-Երևան 2795» տոնակատարությանը մասնակցելու նպատակով Երևան ժամանած Ռուսաստանի Դաշնության հոկեյի ֆեդերացիայի նախագահ, ՌԴ Պետդումայի պատգամավոր, «20-րդ դարի լավագույն հոկեյիստ» տիտղոսակիր Վլադիսլավ Տրետյակին: Հանդիպմանը ներկա է գտնվել նաև ՀՀ սպորտի և երիտասարդության հարցերի նախարար Յուրի Վարդանյանը:

Ողջունելով հյուրին և բարձր գնահատելով Երևանի և Մոսկվայի միջև տարբեր ոլորտներում առկա գործընկերային կապերի մակարդակը՝ քաղաքապետը նկատել է, որ մարզական բնագավառում ևս այդ համագործակցությունը պատշաճ մակարդակի է ու էլ ավելի ընդլայնման հեռանկարներ ունի:

«Շնորհակալ եմ, որ մեզ հետ միասին մասնակցեցիք մեր սիրելի քաղաքի ծննդյան օրվա միջոցառումներին և Ձեր ներկայությամբ մեկ անգամ ևս ապացուցեցիք, որ հայ և ռուս ժողովուրդների բարեկամությունն իրապես գնահատված է բոլոր ժամանակներում: Նաև համոզված եմ, որ Ձեր նման լեգենդար հոկեյիստի այցն ու տեղի մասնագետների հետ շփումները խթան կհանդիսանան, որ Երևանում ավելի շոշափելի զարգացում ունենան ձմեռային մարզաձևեր»,-ընդգծել է Տարոն Մարգարյանը:

Երևանի 2795-ամյակի կապակցությամբ սպորտի բնագավառում հայ ռուսական համագործակցության մեջ ներդրած նշանակալի ավանդի համար քաղաքապետ Տարոն Մարգարյանը Ռուսաստանի Դաշնության հոկեյի ֆեդերացիայի նախագահ, խորհրդային անվանի հոկեյիստ, աշխարհի և օլիմպիական խաղերի բազմակի չեմպիոն Վլադիսլավ Տրետյակին պարգևատրել է Երևանի քաղաքապետի ոսկե մեդալով:
Շնորհակալություն հայտնելով ջերմ ընդունելության և պարգևի համար՝ Վլադիսլավ Տրետյակը նշել է. «Հայաստանում առաջին անգամ եմ և ուրախ եմ, որ այն համընկավ Երևանի 2795-ամյակի տոնակատարությանը: Երևանն իսկապես շատ գեղեցիկ ու պատմական քաղաք է: Համոզված եմ, որ դեռ շատ առիթներ կլինեն այստեղ վերադառնալու, նաև ձմեռային մարզաձևերի զարգացման ուղղությամբ համատեղ ծրագրեր իրականացնելու: Շնորհակալ եմ ու անչափ զգացված այս գնահատանքի համար»: