Նոր մանրամասներ Երևան-Վորոնեժ չվերթից. ինքնաթիռն ուղևորվել է Մոսկվա

Այսօր տեղեկություններ էին տարածվել, որ Վորոնեժի միջազգային օդանավակայանն ուժեղ մառախուղի պատճառով փակվել է։ Ռուսաստանյան լրատվամիջոցները հաղորդել են, որ եղանակային վատ պայմանների պատճառով Երևանից ուղևորված ինքնաթիռին թույլ չի տրվել նախատեսված ժամանակին վայրէջք կատարել։ Ինքնաթիռը «Զվարթնոցից» ուղևորվել է ժամը 8:30-ին. ըստ չվացուցակի` պետք է վայրէջք կատարեր 10.00-ին, սակայն 11.00-ի դրությամբ դեռ ինքնաթիռը վայրէջք չէր կատարել:

Լուրեր.com-ը կապ հաստատեց Երևան-Վորոնեժ չվերթն իրականացնող «Պալյոտ» ընկերության ղեկավար Տիգրան Խաչատրյանի հետ՝ ճշտելու ինքնաթիռի և ուղևորների հետագա ճակատագիրը: Պարոն Խաչատրյանը նշեց, որ չվերթի երթուղին փոխվել է եղանակային վատ պայմանների պատճառով, և ինքնաթիռը բարեհաջող վայրէջք է կատարել Մոսկվայի «Դոմոդեդովո» միջազգային օդանավակայանում: Թե երբ այնտեղից ինքնաթիռը կուղևորվի Վորոնեժ, ընկերության ներկայացուցիչը դժվարացավ նշել: