«ՀայՌուսգազարդն» ու հասարակական կազմակերպությունները հայտարարի չեկան գազի կալորիականության հարցի շուրջ

Սպառողների շահերը պաշտպանող հասարակական կազմակերություններն իրենց դժգոհությունն են հայտնում գազի կալորիականության վերաբերյալ, իսկ «ՀայՌուսգազարդը» հավաստիացնում է՝ Ռուսաստանի Դաշնությունից Հայաստան ներկրվող բնական գազի որակական հատկանիշները համապատասխանում են գործող միջպետական ԳՕՍՏ 5542-87 ստանդարտին։ «ՀայՌուսգազարդում» անցկացվող կլոր սեղան-քննարկման ժամանակ «ՀայՌուսգազարդ» ՓԲԸ-ի գլխավոր տնօրեն Վարդան Հարությունյանը նշեց, որ վերջին տարիներին Հայաստան ներկրված բնական գազը ունեցել է ավելի բարձր կալորիականություն, քան սահմանված է միջպետական ստանդարտով։ «Վերջին տարիներին այդ թիվը տատանվել է 8000-8400 կկալի սահմաններում, այնինչ, միջպետական չափանիշների համաձայն՝ սպառողներին մատակարարվող մեկ խորանարդ մետր բնական գազի ջերմատվությունը պետք է լինի 7600 կիլոկալորիայից բարձր։ Բացի դրանից, գազի որակի մասին տեղեկատվությունը հրապարակվում յուրաքանչյուր տասնօրյակը մեկ անգամ»,-ասաց Հարությունյանը։ Նա առաջարկեց ստեղծել հանձնաժողով և կրկին ստուգումներ անցկացնել բոլոր շահագրգիռ կողմերի ներկայությամբ, եթե նրանք ունենք կասկածներ։

«Իրազեկ ու պաշտպանված սպառող» ՀԿ նախագահ Բաբկեն Պիպոյանը` ներկայացնելով սպառողների դժգոհությունները գազի որակի վերաբերյալ, նշեց, որ կալորիականության մասին «ՀայՌուսգազարդի» պարզաբանումների մեջ եղել են հակասություններ, որն էլ ձևավորել է ներկա հասարակական տրամադրվածությունը։ «Ձեր պարզաբանման մեջ ասվում է, որ եթե գազին խառնվում է օդ, ապա այն պայթում է, այնինչ, գիտությամբ ապացուցված է, որ հնարավոր է գազին խառնել որոշակի քանակի օդ։ Բացի դրանից, գազի կաթսաներում պարզ երևում է, որ գազը վառվում է կարմիր բոցով, իսկ գազի կաթսաներում եղած ֆիլտրերը, որոնք նախատեսված են հինգից ավելի տարիների համար, կեղտոտվում են երկրորդ տարում, ինչը ևս վկայում է գազի որակի մասին»,-ասաց Պիպոյանը։

«ՀայՌուսգազարդի» գլխավոր տնօրենը` չհերքելով Պիպոյանի այն պնդումը, թե հնարավոր է գազին օդ խառնել, միևնույն ժամանակ նշեց, որ «ՀայՌուսգազարդը» չունի նման հնարավորություններ և սարքավորումներ։ «Ներկա պայմաններում մենք չենք կարող օդ խառնել գազին։ Գազի մեջ ի սկզբանե կա թթվածին, սակայն թե ինչ քանակի, ցույց են տալիս լաբորատոր փորձաքննությունները։ Եթե եղածից շեղում լինի, մենք պատրաստ ենք պատասխան տալ»,-ասաց Հարությունյանը։

Հանրային խորհրդի անդամ, Աժ նախկին պատգամավոր Արշակ Սադոյանն առաջարկեց ստեղծել շրջիկ խմբեր, որոնք կստուգեն գազի որակը։ «Գազի կալորիականությունը ստուգելու լավագույն տարբերակն այն է, երբ չափում ես գազի ծախսը և ջերմաստիճանը՝ հաշվելով օգտակար գործողության գործակիցը»,-ասաց Սադոյանը։ Վարդան Հարությունյանը պատրաստակամություն հատնեց նման ձևով ևս փորձաքննություն կազմակերպել։ «Տվեք հասցեները և մենք կստուգենք գազի այրման պրոցեսը»,-ասաց Հարությունյանը։

ՀՀ Չափագրության ազգային ինստիտուտի տնօրեն Վահան Սահակյանը` փարատելով կալորիականության վերաբերյալ կասկածները, նշեց, որ Հայաստան ներկրվող գազը փորձաքննություն է անցնում նաև վրացական սահմանին։

Քննարկման սկզբում առաջարկված հանձնաժողովի ձևավորման շուրջ կողմերը ընդհանուր հայտարարի չեկան։

«ՀայՌուսգազարդն» ունի ՀՀ էկոնոմիկայի նախարարության կողմից հավատարմագրված ստացիոնար և շարժական լաբորատորիաներ, որտեղ կանոնավոր կերպով կատարվում են բնական գազի որակական հատկանիշների ստուգումներ: Նման լաբորատորիաներ ունեն Հայաստանի խոշորագույն գազ սպառողները՝ Հրազդանի ՋԷԿ-ը, Երևանի ՋԷԿ-ը և «Արարատցեմենտ» գործարաը: Այսինքն, բացի «ՀայՌուսգազարդի» լաբորատորիայից, Հայաստանում կա ևս երեք անկախ լաբորատորիա: