Գիտնականները պարզել են՝ ինչպես չորացրած բանջարեղենը սննդային արժեքով գրեթե հավասարեցնել թարմին

Ռուս գիտնականները հաշվարկել են, թե որքան ջուր է անհրաժեշտ ավելացնել չորացրած բանջարեղենին, որպեսզի դրա սննդային արժեքը հնարավորինս մոտ լինի թարմ բանջարեղենին։ Հետազոտության համար օգտագործվել են ճակնդեղ, գազար, կարտոֆիլ և սոխ։

Փորձերը ցույց են տվել, որ ինֆրակարմիր եղանակով չորացնելիս սննդանյութերը, հատկապես վիտամին C-ն, ավելի լավ են պահպանվում, քան տաք օդով սովորական չորացման դեպքում։ Առաջին եղանակով վիտամին C-ի պահպանման ցուցանիշը կազմել է 61-71%, իսկ սովորական չորացման դեպքում՝ 48-57%։

Գիտնականները հաշվարկել են նաև յուրաքանչյուր մթերքի վերականգնման համար անհրաժեշտ ջրի ճշգրիտ քանակը։ Ջուր ավելացնելուց հետո բանջարեղենի հիմնական սննդանյութերի՝ սպիտակուցների, ճարպերի և ածխաջրերի ցուցանիշները 95-104%-ով համապատասխանել են թարմ բանջարեղենի ցուցանիշներին։

Վերականգնված բանջարեղենից պատրաստվել են նաև հնդկաձավարով ուտեստ և բորշ։ Լաբորատոր հետազոտությունները ցույց են տվել, որ կալորիականությամբ և հիմնական սննդանյութերի պարունակությամբ դրանք գրեթե չեն տարբերվել թարմ բանջարեղենով պատրաստված նույն ուտեստներից։