Կառավարությունը քայլեր է ձեռնարկում օտարերկրացիների իրավունքների խախտումները կանխելու համար

Ազգային ժողովի պետաիրավական հարցերի մշտական հանձնաժողովը դրական եզրակացություն տվեց «Վարաչական իրավախախտումների վերաբերյալ» ՀՀ օրենքում փոփոխություն և լրացում կատարելու նախագծին, որով նախատեսվում է մի շարք հոդվածներում «օտարերկրյա քաղաքացիները և քաղաքացիություն չունեցող անձինք» բառերից հետո լրացնել «օտարերկրացիներ» բառը: Հիմնական զեկուցով, ՀՀ արդարադ ատության նախարար Հրայր Թովմասյանը նշեց, որ սույն նախագիծն անհրաժեշտ է ազգային օրենսդրության համահունչությունը, տերմինաբանական հստակեցումը և իրավակիրառ պրակտիկայի բարելավումն ապահովելու նպատակով' օտարերկրյա քաղաքացիների և քաղաքացիություն չունեցող անձանց իրավունքների խախտումները կանխելու համար: «Անհրաժեշտությունը պայմանավորված է նաև 2011 թվականի նոյեմբերի ՀՀ կառավարության որոշմամբ հաստատված ՀՀ միգրացիայի պետական կարգավորման քաղաքականության հայեցակարգի իրականացման 2012-2016 թվականների գործողությունների ծրագրի 7.4.2 կետով»,-նշեց նախարարը:

Թովմասյանն ընդգծեց, որ թեև 2011թ. նոյեմբերի 30-ին ընդունված օրենքով փոփոխություններ և լրացումներ են կատարվել ՀՀ վարչական իրավախախտումների վերաբերյալ (ՎԻՎ) օրենսգրքում, որոնք ուժի մեջ են մտել 2012թ. հունիսի 1-ից, բայց միգրացիոն օրենսդրությանը վերաբերող որոշ իրավախախտումներ կարիք ունեն հստակեցվելու կամ մանրամասնեցվելու և հետևաբար ուղղակիորեն ամրագրվելու ՀՀ ՎԻՎ օրենսգրում:

Այսպես, տերմինաբանական անճշտությունից խուսափելու նպատակով առաջարկվում է ՀՀ ՎԻՎ օրենսգրքի 16-րդ եւ 23-րդ հոդվածներում «օտարերկրյա քաղաքացիները և քաղաքացիություն չունեցող անձինք» և «օտարերկրյա քաղաքացիների և քաղաքացիություն չունեցող անձանց» բառերը փոխարինել «օտարերկրացիներ» և «օտարերկրացիների» բառերով: Քանի որ «Օտարերկրացի» եզրույթը նախատեսված է «Օտարերկրացիների մասին» ՀՀ օրենքի 2-րդ հոդվածում, որի համաձայն «Սույն օրենքով «օտարերկրացիներ» հասկացության մեջ ներառվում են Հայաստանի Հանրապետության քաղաքացի չհամարվող այն անձինք, որոնք ունեն այլ պետության քաղաքացիություն (օտարերկրյա քաղաքացիներ) կամ չունեն որևէ պետության քաղաքացիություն (քաղաքացիություն չունեցող անձինք):» Քանի որ ՀՀ ՎԻՎ 201-րդ հոդվածում կիրառվում է «օտարերկրացի» եզրույթը, հետևաբար անհրաժեշտ է ՀՀ ՎԻՎ-ի տերմինաբանությունը միասնականացնել: Բացի այդ, միևնույն իրավական ակտում նույն տերմինի երկիմաստ կիրառումը կառաջացնի բարդություններ իրավակիրառ պրակտիկայում: Հետևաբար, տերմինների հստակեցման տեսանկյունից նման փոփոխությունն իրականացնելը հիմնավորված է և անհրաժեշտ:

Նախագծով նախատեսվում է նոր խմբագրությամբ շարադրել ՀՀ ՎԻՎ օրենսգրքի 201-րդ հոդվածը և տերմինաբանական հստակեցում իրականացնել 16-րդ և 23-րդ հոդվածներում, որով կլուծվեն վերը նշված խնդիրներն ու բացերը: Նախագծի ընդունման արդյունքում ակնկալվում է Վարչական իրավախախտումների վերաբերյալ Հայաստանի Հանրապետության օրենսգիրքը համահունչ դարձնել այլ իրավական ակտերի հետ, բացի այդ իրականացվում է Ծրագրի 7.4.2 կետը: