Կիվիրյանի գործով ցուցմունք կտան ոստիկանները

«Armenia Today» լրատվական կայքի համակարգող, վերլուծաբան Արգիշտի Կիվիրյանի դեմ հարուցված քրեական գործով երկրորդ դատական նիստը տեղի կունենա փետրվարի 25-ին ժամը 10:00-ին ՀՀ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում (հասցե՝ Հր. Ներսիսյան 10):

«Armenia Today» լրատվական կայքի համակարգող, վերլուծաբան Արգիշտի Կիվիրյանի դեմ ՀՀ ՔՕ 316-րդ հոդվածի 1-ին մասով (իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը) հարուցված քրեական գործի երկրորդ դատական նիստը տեղի կունենա ս.թ. փետրվարի 25-ին ժամը 10:00-ին ՀՀ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում (դատավոր' Արթուր Մկրտչյան):

Հիշեցնենք, որ Ա. Կիվիրյանը մեղադրվում է 2013թ. օգոստոսի 24-ին Կոմիտաս 5 հասցեում տեղի ունեցած բողոքի ակցիայի ժամանակ նրան բերման ենթարկելիս ոստիկանի նկատմամբ բռնություն գործադրելու մեջ: Այնինչ, նույն օրը, ոստիկանները բազմաթիվ ապօրինություններ և բռնություններ են իրականացրել Կիվիրյանի նկատմամբ, սակայն քր.գործ հարուցվել է ոչ թե այդ առթիվ այլ ՀՀ ոստիկանության Երևան քաղաքի վարչության ՊՊԾ գնդի 1-ին հատուկ գումարտակի, 2-րդ վաշտի, 3-րդ դասակի հրամանատար Վահան Վրթանեսյանի հաղորդման հիման վրա, թե իբր Կիվիրյանն է հարվածներ հասցրել նրան և զբաղվել ինքնավնասմամբ՝ գլուխը հրավածելով ոստիկանական ավտոմեքենայի դռանը:

Գործը երեք անգամ նախաքննական մարմին վերադառնալուց հետո հունվարի 22-ին ի վերջո հանձնվեց դատարան: Առաջին դատական նիստի ընթացքում՝ փետրվարի 12-ին, Կիվիրյանի պաշտպանները, բացահայտելով դատավորի կողմից թույլ տված ապօրինությունները, մեղադրեցին վերջինիս կողմնակալության մեջ և ինքնաբացարկի միջնորդություն ներկայացրեցին: Մասնավորապես, դատավորը՝ ա) 01.02.2014թ. որոշում է կայացրել Կիվիրյանի նկատմամբ 07.11.2013թ. ընտրված և ավելի ուշ դատախազի ցուցումով ՀՔԾ քննիչ Լևոն Մելքոնյանի կողմից «ստորագրությունը չհեռանալու մասին» վերացված խափանման միջոցը թողնել անփոփոխ, բ) նուն որոշման մեջ գտել է, որ քրեադատավարական օրենքի էական խախտումներ առկա չեն և քրեական գործի վարույթը կարճելու հիմքեր չկան, չնայած դրանց առկայությանը, գ) առանց դատավարական որևէ կողմի ծանուցելու՝ վրիպակն ուղղելու նպատակով փետրվարի 10-ին նիստ է հրավիրել և «անհստակությունները վերացնելու մասին» որոշում կայացրել, դ) մերժել է դատական նիստի ձայնագրությունը էլեկտրոնային կրիչով Կիվիրյանի պաշտպաններին տրամադրելու օրինական պահանջը, փոխարենը ներկայացվնելով միայն թղթային տարբերակը՝ երկէջ կոպիտ սխալների առկայությամբ արձանագրության տեսքով: Դատավորը մերժեց երկու անգամ իրեն ներկայացրած ինքնաբացարկի միջնորդությունը:

Հաջորդ դատական նիստին՝ փետրվարի 25-ին, պետք է ցուցմունք տան այն ոստիկանները, որոնք բռնություն են գործադրել Ա.Կիվիրյանի նկատմամբ և մեղադրյալ ճանաչվելու փոխարեն ճանաչվել են տուժող և վկա:

Ա.Կիվիրյանի պաշտպանները 16.01.2014թ. ՀՔԾ միջնորդություն են ներկայացրել պահանջելով կարճել Կիվիրյանի դեմ հարուցված քր. գործը և պատասխանատվության ենթարկել նրա նկատմամբ բռնություն գործած ոստիկաններին: Միջնորդությունը մերժվել է, իսկ վերջինիս բողոքի քննությունը տեղի կունենա մարտի 3-ին:

Ա.Կիվիրյանը հրաժարվել է օգտվել իրեն առաջարկված համաներումից և հայտարարել, որ շարունակելու է պայքարը հանուն արդարության, որպեսզի իր խախտված իրավունքները վերականգնվեն և իր նկատմամբ բռնություններ և ապօրինություններ գործած անձինք ենթարկվեն պատասխանատվության:

Ա.Կիվիրյանի համախոհները կոչ են անում միանալ այս պայքարին, քանի որ Հայաստանի ազատ քաղաքացիները պետք է պայքարեն արդարության վերականգնման համար և թույլ չտան քաղաքական հալածյալ՝ «Սա բոլորիս պայքարն է, քանի որ ցանկացած ապօրինություն քաղաքացու նկատմամբ խոցելի է դարձնում ողջ հասարակությունը: Բոլորի ներկայությունը Արգիշտի Կիվիրյանի դատական նիստերին խիստ ողջունելի է: (հասցե՝ Հր. Ներսիսյան 10)»: