Ոստիկանության Վարդենիսի բաժնի նախկին պետի նկատմամբ խափանման միջոց է կիրառվել կալանավորումը.ՀՔԾ

ՀՀ ոստիկանության ներքին անվտանգության վարչության կողմից կատարված ծառայողական քննության նյութերի, ինչպես նաև Ոստիկանության աշխատակիցներ Ք. Բ.-ի ու Վ. Ղ.-ի հաղորդումների հիման վրա ՀՀ հատուկ քննչական ծառայությունում նախապատրաստված նյութերով` ՀՀ ՔՕ 308-րդ հոդվածի և 309-րդ հոդվածի 1-ին մասերով 2013թ. դեկտեմբերի 30-ին հարուցվել էր քրեական գործ: Ըստ նյութերի` 2013թ. նոյեմբերի 19-ին ՀՀ ոստիկանության Գեղարքունիքի մարզային վարչության աշխատակիցներ Ք. Բ.-ին ու Վ. Ղ.-ին է դիմել Գեղարքունիքի մարզի գյուղերից մեկի բնակիչ Մ. Ս.-ն և բանավոր հայտնել այն մասին, որ այդ գիշեր անհայտ անձը կրակել է իր տան վրա, հրազենի գնդակն, ապակին կոտրելով, մտել է ներս և մխրճվել ննջարանի պատի մեջ: Ք. Բ.-ն ու Վ. Ղ.-ն ոստիկանության բաժնի պետին անմիջապես զեկուցել են դեպքի մասին, վերջինս էլ հանձնարարել է առանց Մ. Ս.-ից հաղորդում ընդունելու` մեկնել դեպքի վայր, ճշտել մանրամասները: Ոստիկանության աշխատակիցներն անձամբ են տեսել պատի վրա առկա հրազենային վնա սվածքը, որից վերցրել են հրազենային գնդակը և զեկուցել իրենց կողմից պարզված հանգամանքների մասին:

Բաժնի պետը, ակնհայտորեն դուրս գալով իր լիազորությունների շրջանակից` ապօրինի ցուցում է տվել` Մ. Ս.-ից հաղորդում չընդունել, որով փաստորեն թաքցրել է հանցագործության դեպքը հաշվառումից: Նշված քրեական գործով ձեռք բերված ապացույցների հիման վրա ՀՀ ոստիկանության Վարդենիսի բաժնի նախկին պետ Կարեն Մելիքյանը ներգրավվել է որպես մեղադրյալ և նրա նկատմամբ խափանման միջոց է ընտրվել կալանավորումը: Նախաքննությունը շարունակվում է: