Մամիկոն Խոջոյանի` դիվերսանտ լինելու վարկածը պրիմիտիվ ու մարազմատիկ էր. Լարիսա Ալավերդյան

«Ընդդեմ իրավական կամայականության» հասարակական կազմակերպությունը նախապատրաստվում է դիմել միջազգային կազմակերպություններին' բարձրաձայնելու ադրբեջանցիների կողմից գերի ընկած և վերջերս հայրենադարձված Մամիկոն Խոջոյանի խոշտանգումների վերաբերյալ: Լրագրողների հետ հանդիպման ժամանակ այս մասին տեղեկացրեց մարդու իրավունքների առաջին պաշտպան, «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը' նշելով, որ 1-2 շաբաթվա ընթացքում իրենք կփորձեն հայտ ներկայացնել Մարդու իրավունքների եվրոպական դատարան: «Մեկ-երկու շաբաթվա ընթացքում փորձելու ենք հայտ ներկայացնել Մարդու իրավունքների եվրոպական դատարան, ինչպես նաև ՄԱԿ-ի համապատասխան գործույթով զբաղվող մարմնին: Ես զգուշավոր եմ, քանի որ եվրոպական դատարան հայց պատրաստելը մանրակրկիտ և մեծ իրավական հմտություններ պահանջող աշխատանք է: Երկրորդը' մենք պետք է կարողանանք շփվել Մամիկոն Խոջոյանի հետ, ով պետք է ինչ-որ ֆիզիկական վիճակի հասնի, որ կարողանա իր հետ կատարվածի մասին պատմել»,-ասաց Լարիսա Ալավերդյանը' նշելով, որ իրենց կազմակերպությանն իրավաբանական աջակցություն են առաջարկել հմուտ իրավաբաններ, ում ծառայություններից իրենք կօգտվեն:

Լարիսա Ալավերդյանի խոսքով' եվրոպական դատարանից սպասվելիք վճիռն ու փոխհատուցումը շատ տարբեր կարող է լինել: «Փոխհատուցումը գնահատվում է' ըստ նրա, թե ինչ ֆիզիկական վնաս է հասցվել անձին և ինչ է հարկավոր նրան վերականգնվելու համար»,-ասաց Լարիսա Ալավերդյանը' հավելելով, որ Մամիկոն Խոջոյանը ենթարկվել է ոչ միայն դաժան վերաբերմունքի, այլև խոշտանգումների, ինչը Ժնևյան կոնվենցիայի կոպիտ խախտում է: «Խոշտանգում են մարդուն, որ ստանան տեղեկություններ, բայց Մամիկոն Խոջոյանն այն մարդն էր, ով ի վիճակի չէր էլ որևէ տեղեկություն հաղորդել: Ես նույնիսկ կարծում եմ, որ իրենք վերադարձրեցին այս մարդուն' վախենալով, որ նա կմահանա ու այդ դեպքում իրենց հանցագործությունն առավել ծանր կլինի»,-նկատեց Լարիսա Ալավերդյանը' կարևոր համարելով այն հանգամանքը, որ ադրբեջանցիների հերթական սադրիչ վարկածը, թե Մամիկոն Խոջոյանը դիվերսանտ է, հերքվել է իրենց իսկ առաջադեմ քաղաքացիների կողմից: «Այդ վարկածն այնքան պրիմիտիվ ու մարազմատիկ էր, որ առաջադեմ մտածող անձանց համար հնարավոր չէր ընդունել այդ վարկածը»,-ասաց Լարիսա Ալավերդյանը:

Ավելի քան մեկ ամիս առաջ 77-ամյա Մամիկոն Խոջոյանը, ով ուներ հոգեկան խնդիրներ, անուշադրության պատճառով հատել էր հայ-ադրբեջանական սահմանը ու հայտնվել ադրբեջանական կողմում, ուր նրան որակել էին որպես դիվերսանտ կամ նրանց ուղեկցող անձ: Այդ մոտեցումը քննադատության էր արժանացել հենց ադրբեջանցիների կողմից: 77-ամյա Մամիկոն Խոջոյանի հետ Ադրբեջանում հարցազրույց էին արել ու հրապարակել ադրբեջանական լրատվամիջոցներում' խախտելով գերիների մասին Ժնևյան կոնվենցիան: Հարցազրույցի ժամանակ պարզ էր դարձել, որ Խոջոյանի ձեռքը կոտրված է:

Մարտի 4-ին Մամիկոն Խոջոյանը Կարմիր խաչի միջազգային կոմիտեի (ԿԽՄԿ) հովանու ներքո վերադարձվել է Հայաստան: Նրան անմիջապես տեղափոխել են Իջևանի բժշկական կենտրոն, ուր նրա մարմնի վրա հայտնաբերվել են բռնության բազմաթիվ հետքեր: Պարզվել է, որ նա ունի նաև հրազենային վնասվածք: