Ֆինանսների նախարարության մոտից բերման ենթարկվածներն ազատ արձակվեցին. ակցիան ավարտվեց

ՀՀ ֆինանսների նախարարության մոտ ակցիային մասնակցած և ոստիկանության օրինական պահանջներին չենթարկվելու համար բերման ենթարկված' «Դ!եմ եմ» նախաձեռնության երեք անդամներն էլ ազատ արձակվեցին: Ակցիայի մասնակիցները նրանց դիմավորեցին Ոստիկանության Երևանի Կենտրոնականի բաժնի մոտ: Բերման ենթարկվածներից Դավիթ Աղաբեկյանը նշեց, որ իրենց նկատմամբ բռնություն չի կիրառվել, իրենց տեղեկացրել են, որ վարչական իրավախախտման արձանագրություն է կազմվել' Վարչական իրավախախտումների մասին օրենսգրքի 182-րդ հոդվածի համաձայն (հասարակական կարգի պահպանության պարտականությունները կատարելու ընթացքում ոստիկանության ծառայողի կամ զինծառայողի օրինական կարգադրությանը կամ պահանջին չարամտորեն չենթարկվելը՝ առաջացնում է տուգանքի նշանակում՝ սահմանված նվազագույն աշխատավարձի տասնապատիկից մինչև հիսնապատիկի չափով):

Ակցիան ավարտվեց: Մասնակիցները ցրվեցին ոստիկանական բաժանմունքի մոտից:

ՀՀ ֆինանսների նախարարության դիմաց կուտակային կենսաթոշակային համակարգի դեմ բողոքող մի քանի տասնյակ երիտասարդներ մարտի 7-ին փորձել են խոչընդոտել երթևեկությունը, փակել են Նալբանդյան փողոցը: Նրանք չեն ենթարկվել ոստիկանների' փողոցի բնականոն երթևեկությունը չխախտելու պահանջը, ինչից հետո տեղի է ունեցել հրմշտոց, երեք ակտիվիստ բերման է ենթարկվել ոստիկանություն: Ոստիկանները շղթա են կազմել' նրանց հետ քաշելով բանուկ հատվածից, որպեսզի կանխեն խցանումները երթևեկության թեժ ժամին: Նախքան ոստիկանական շղթան կազմելը շենքից դուրս են եկել նախարարության աշխատակազմի ղեկավարն ու ներկայացուցիչները և Երևանի փոխոստիկանապետ Վալերի Օսիպյանի հետ առաջարկել մի քանի հոգանոց խումբ կազմել և գնալ նախարարություն և ներկայացնել նրանց պահանջները հենց նախարար Դավիթ Սարգսյանին: Նախաձեռնության անդամները, սակայն, հրաժարվել են մեկ խմբով գնալ նախարարի մոտ: