Սուրեն Խաչատրյանը «քցել է» Նելսոն Ոսկանյանին կամ քաղաքապետը՝ քավության նոխազ

Գորիսի քաղաքապետ Նելսոն Ոսկանյանի կողմից ապօրինի հողհատկացման հետ կապված հարուցվել է քրեական գործ: Այս մասին Լուրեր.com-ին հայտնի դարձավ Գորիսի քաղաքապետարանին մոտ կանգնած աղբյուրներից:

Պարզվում է` Նելսոն Ոսկանյանն անօրինական ճանապարհով հողատարածքներ է տրամադրել Սյունիքի նախկին մարզպետ Սուրեն Խաչատրյանին և վերջինիս մերձավորներին:

Այն, որ քրեական գործը հարուցվել է, հաստատ է, միայն թե ոչ թե կոնկրետ քաղաքապետի, այլ Գորիսի քաղաքապետարանի իրավասու պաշտոնատար անձանց նկատմամբ:

ՀՀ Գլխավոր դատախազությունից Լուրեր.com-ի գրավոր հարցմանն ի պատասխան տեղեկացրել էին, որ ՀՀ ոստիկանության Սյունիքի մարզի քննչական բաժնում ներկայումս քննվում է 2 քրեական գործ` ոչ թե Գորիսի քաղաքապետ Ն. Ոսկանյանի դեմ, այլ Գորիսի քաղաքապետարանի իրավասու պաշտոնատար անձանց կողմից իրենց պաշտոնեական դիրքն ու լիազորությունները չարաշահելու փաստերի վերաբերյալ:

Երկու գործն էլ կապված է տարածքներ տրամադրելու հետ:

Գորիսի քաղաքապետարանի ներկայացուցիչ Աննա Դավթյանը, սակայն, մեզ հետ զրույցում նշեց, որ քրեական գործ չի հարուցվել, և ամեն ինչ եղել է օրենքի սահմաններում:

«Ապօրինի չի եղել, և ամեն ինչ կատարվել է օրենքի սահմաններում, քրեական գործ չի հարուցվել, պարզապես քննվում է ոստիկանության կողմից»:

Հարցին, թե օրինական գործարքի պարագայում, ո՞րն է պատճառը, որ այն քննվում է ոստիկանության կողմից, Դավթյանն ասաց. «Ինտերնետային կայքերում գրվել է, դրա մասին քննիչները փորձել են պարզել` իրականությանը համապատասխանում է, թե ոչ»:

Աննա Դավթյանը նաև նշեց, որ հողատարածքներ տրամադրվել են ինչպես կազմակերպությունների, այնպես էլ անհատների:

Գլխավոր դատախազության կողմից նշված երկու քրեական գործերից առաջինը հարուցվել է 2013թ. դեկտեմբերի 3-ին, ՀՀ ոստիկանության Գորիսի քննչական բաժանմունքում` ՀՀ քրեական օրենսգրքի 308-րդ հոդվածի 1-ին մասի հատկանիշներով` «Ասեկոսե.am» համացանցային լրատվական էլեկտրոնային կայքի` 18.11.2013թ. «Ինչ արել եմ, կարգով եմ արել, ինչ չեմ արել` օրենքով կանեմ, եղավ. Գորիսի քաղաքապետ» վերտառությամբ հրապարակման և Գորիսի քաղաքապետարանի կողմից անհատույց կամ շուկայականից ակնհայտ ցածր գներով մի շարք տարածքներ օտարելու, ինչպես նաև անհիմն կերպով գույքահարկի գումարները զիջելու վերաբերյալ Սյունիքի մարզի դատախազությունում ստացված դիմումի հիման վրա նախապատրաստված նյութերով:

Երկրորդ քրեական գործը հարուցվել է 2014թ. հունվարի 18-ին, Գորիսի քննչական բաժանմունքում` ՀՀ քրեական օրենսգրքի 308 հոդվածի 1-ին մասի և 214 հոդվածի 1-ին մասի հատկանիշներով` «Առավոտ.ամ» ինտերնետային կայքում` «Գորիսի քաղաքապետարանի հայտարարած մրցույթներում հիմնականում շահում է Գորիսի քաղաքապետին պատկանող կազմակերպությունը» և «Գորիսի քաղաքապետը պարզաբանում է» հրապարակումների հիման վրա նախապատրաստված նյութերով:

Հարուցված քրեական գործերով ընթանում է նախաքննություն, և այս պահին նախաքննական մարմինը վերոնշյալ գործերով որևէ մեկի դեռևս մեղադրանք չի առաջադրել` որպես մեղադրյալ ներգրավված անձ չկա:

Ազատուհի Արասխանյան