Հայաստանն արդարադատության ոլորտի բարեփոխումներում շարունակում է ակտիվ համագործակցությունը ԵՄ-ի հետ

Հայաստանն ակտիվորեն շարունակում է համագործակցությունը Եվրամիության հետ' ՀՀ արդարադատության ոլորտում բարեփոխումների իրականացման համար: Այս մասին Ազգային ժողովում կառավարության հետ հարց ու պատասխանի ժամանակ ասաց ՀՀ արդարադատության նախարար Հրայր Թովմասյանը՝ պատասխանելով «Ժառանգություն» խմբակցության քարտուղար Թևան Պողոսյանի հարցին: «Այս պահին շարունակվում են բանակցությունները Հայաստանում արդարադատության ոլորտում բարեփոխումների իրականացման համար 20 միլիոն եվրո բյուջետային հատկացման համար: Ինչպես նաև արդեն կնքված և ՀՀ նախագահի կողմից հաստատված է 29 միլիոն եվրո բյուջետային հատկացման մասին համաձայնագիրը: Սա խոսում է այն մասին, որ համագործակցությունն ակտիվորեն շարունակվում է: Այս գործընթացում որևէ հետընթաց չկա»,-նշեց Թովմասյանը:

Նա տեղեկացրեց նաև, որ արդեն այս տարի Հայաստանը Եվրամիությունից կստանա ևս 7 միլոն եվրո գումար: «Մենք շարունակում ենք Եվրամիության հետ համագործակցությունը նաև եվրոպական չափանիշներին համապատասխանող քրեակատարողական համակարգ ունենալու համար»,- ընդգծեց Թովմասյանը:

Նախարարի խոսքով' արդեն վերջնական փուլում է Եվրոպայի Խորհրդի հետ իրականացվող արդարադատության մատչելիության ծրագիրը, որի իրականացման համար Հայաստանը ևս 1.5 միլիոն եվրո կստանա: