Հայաստանում 2013թ.-ին նախորդ տարվա համեմատ աճել են թմրամիջոցների ապօրինի շրջանառության դեպքերը

Իրավունք 26 Մարտ, 2014 13:26

Թեև վերջերս ՀՀ ոստիկանության կողմից հայտնաբերվել և առգրավվել է թմրամիջոցների աննախադեպ խոշոր խմբաքանակ, Հայաստանը, այնուհանդերձ, չի պատկանում թմրամիջոցների ապօրինի շրջանառության և թմրամիջոցների կիրառության ահագնացող ծավալների ծանր ազդեցության տակ գտնվող երկրների թվին: Այս մասին մարտի 24-ին ՄԱԿ-ի հայաստանյան գրասենյակում տեղի ունեցած թմրամիջոցների վերահսկման միջազգային խորհրդի 2013թ. տարեկան զեկույցի ներկայացման ժամանակ նշել է ՄԱԿ-ի մշտական համակարգող Բրետլի Բուզետտոն:

ՀՀ ոստիկանության կազմակերպված հանցավորության դեմ պայքարի գլխավոր վարչության թմրամիջոցների անօրինական շրջանառության դեմ պայքարի վարչության օպերատիվ տեղեկատվության բաժանմունքի պետ, ոստիկանության փոխգնդապետ Արթուր Մինասյանը տեղեկացրել է, որ ՀՀ ոստիկանության հիմնական կազմակերպչական միջոցառումների պլանի համաձայն' յուրաքանչյուր տարի Հայաստանի Հանրապետության ողջ տարածքում անցկացվում է «Կանեփ-կակաչ» համալիր օպերատիվ-կանխարգելիչ միջոցառումը, և չնայած տարածաշրջանի մյուս երկրների համեմատ լավ դիրքին' 2013 թվականին, նախորդ տարվա համեմատությամբ, Հայաստանում գրանցվել է թմրամիջոցների ապօրինի շրջանառության հանցագործությունների աճ' 83 դեպքով: Ավելացել են նաև թմրամիջոց պարունակող բույսերի աճեցման դեպքերը: Դրան զուգահեռ' ավելացել են ապօրինի պահվող թմրամիջոցներին առնչվող հանցագործությունների բացահայտման և հոգեմետ նյութերի առգրավման դեպքերը: 2013 թվականին ՀՀ ոստիկանության համապատասխան ստորաբաժանումների կողմից ձեռնարկված միջոցառումների շնորհիվ հայտնաբերվել և ապօրինի շրջանառությունից հանվել է 93.594 կգ տարբեր տեսակի թմրամիջոց, առգրավվել է նաև 40.7 գրամ հոգեմետ նյութ, 337.5 մլ պրեկուրսոր:

Արթուր Մինասյանը նաև նշել է, որ նարկոլոգիական կլինիկայի տվյալների համաձայն' 2014 թվականի հունվարի 1-ի դրությամբ ՀՀ-ում հաշվառվել է 5022 թմրամոլ, իսկ նախորդ տարվա նույն ժամանակահատվածում այդ թիվը կազմում էր 4332: Այսինքն, նկատելի է ցուցանիշի աճի միտում: Ըստ ոստիկանության ներկայացուցչի' ՀՀ-ում անչափահասների կողմից թմրամիջոցների ապօրինի օգտագործումը չի գերազանցում 8-10 ցուցանիշը, ինչը մյուս պետություններում աճի միտում ունի: Իսկ գործածողների հիմնական մասը 30-35-ից բարձր տարիք ունեցողներն են:

ՄԱԿ-ի հայաստանյան գրասենյակում մարտի 24-ին տեղի է ունեցել մամուլի ասուլիս, որի ընթացքում քննարկվել են թմրամիջոցների վերահսկման միջազգային խորհրդի 2013 թվականի տարեկան զեկույցի դրույթները: Միջոցառմանը մասնակցել են ՄԱԿ-ի հայաստանյան գրասենյակի, ՀՀ գլխավոր դատախազության, արդարադատության, առողջապահության, կրթության և գիտության նախարարությունների, ՀՀ ոստիկանության, պետեկամուտների կոմիտեի և ազգային անվտանգության ծառայության ներկայացուցիչներ: