Ես ամբողջ կյանքս ձեզանից ներողություն եմ հայցելու. Վարդան Պետրոսյանը` տուժող կողմին

Կոտայքի մարզի ընդհանուր իրավասության դատարանում, դատավոր Վաղինակ Մկրտչյանի նախագահությամբ, վերսկսվել է ճանաչված դերասան Վարդան Պետրոսյանի գործով դատավարությունը: Այն ընդմիջվել էր մարտի 12-ին' պաշտպանական կողմի միջնորդությամբ: Դատաքննությանն այսօր ներգրավվել են Ֆրանսիայից ժամանած երկու փաստաբաններ' Ժերար Չոլաչկանն ու Մարի Տոզենը: Նիկոլայ Բաղդասարյանի հետ միասին նրանք կներկայացնեն Պետրոսյանի շահերը:

Նիստից առաջ վատացել է տուժողի իրավահաջորդներ Աննա Կարապետյանի, Հայկ Հակոբյանի եւ Արթուր Հակոբյանի ինքնազգացողությունը: Դատարան է հրավիրվել շտապօգնության բրիգադ:

Վարդան Պետրոսյանի փաստաբան Նիկոլայ Բաղդասարյանը դատարանին միջնորդություն ներկայացրեց իր պաշտպանյալին նախնական կալանքից անհապաղ ազատելու վերաբերյալ ՝ նշելով, որ նա ապօրինաբար է պահվում: Վարդան Պետրոսյանը, դատարանի կողմից խոսքի իրավունք ստանալով, նշեց, որ միանում է միջնորդությանը և ցանկանում է խոսք ասել: «Սա ճառ չի, ցուցմունք չի, ընդամենը կարծիք է՝ հիմնավորելու համար պաշտպանիս խոսքերը: Այս գործը նաև բարոյական հարց է: Ես խոսքս ուղղում եմ ձեզ, սիրելի մայրեր: Անտակ է ձեր վիշտը .. ..»,- ասաց նա:

Վարդան Պետրոսյանը, շարունակելով խոսքը, նշեց, որ լավ կլիներ, որ ինքն ընդհանրապես ծնված չլիներ: «Կարծում եմ՝ ես դրան արժանացել եմ... լավ կլիներ՝ ես ծնված չլինեի, մեռած լինեի. այդ մասին ինքս եմ ասել, լավ կլիներ' ես չլինեի, տղաներն ապրեին: Էսպես թե էնպես' նիստն ընթանալու է՝ անկախ մեր կամքից. ես դատվելու եմ»,- ասաց դերասանը: Անդրադառնալով նախնական կալանքը որպես խափանման միջոց ընտրելուն՝ նա հիշեցրեց, որ իրեն դատարան են բերել հիվանդանոցից՝ ծանր վիճակում:

Դերասանը հիշեցրեց, թե ինչպես է դատավորը դիմել քննիչին՝ հարցնելով, թե արդյոք Վարդան Պետրոսյանն այդ վիճակում ի վիճակի է վնասել, սպանել, փախչել, այն դեպքում, երբ վթարից օրեր անց բոլոր սահմանները փակ են եղել: «Ինձ համար վիրավորական էր ինձ անընդհատ որպես փախստական ներկայացնելը»,- ասաց Պետրոսյանը՝ ընդգծելով, որ երբ անգամ հիմքեր չկային նախնական կալանքի համար, դատավորը գնաց խորհրդակցական սենյակ, վեց ժամ անց վերադարձավ և կալանքի մասին որոշում կայացրեց:

Այնուհետև Վարդան Պետրոսյանը հայտարարեց, որ պատրաստ է հրապարակավ ներողություն խնդրել տուժողներից և հասկանում է նրանց ողբերգությունը: «Դուք ասել եք, որ Վարդան Պետրոսյանը պիտի հեռուստատեսությամբ ներողություն խնդրի, տասը հեռուստաընկերություն կա այստեղ, թող աշխարհը տեսնի, կարծում եք՝ ես պիտի վախենա՞մ կամ ամաչե՞մ ձեզանից ներում հայցել: Ես ամբողջ կյանքս ձեզնից ներում եմ հայցելու, ես էլ հայր եմ, ես հաճախ եմ երեխաներին նայում, աղոթում նրանց համար ... Սա իմ ողբերգությունն է. ես գիտեմ՝ ինչ է մայր սգավոր, ինչ է հայր: Թույլ տվեք՝ հենց հիմա ծնկի գամ ձեր առաջ: Չեմ կարող, թույլ չեն տալիս, տեսնում եք՝ բարոյական քայլ եմ անում՝ օրենքն է դիմացս կանգնում, օրենքին եմ ապավինում, բարոյականությունն են դեմ տալիս»,- եզրափակեց դերասանը:

Այս պահին դատարանը խորհրդակցական սենյակում է' միջնորդությամն կապակցությամբ որոշում կայացնելու համար:

Ըստ մեղադրական եզրակացության համառոտ բովանդակության' Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, անձնական օգտագործման «ԲՄՎ-320» մակնիշի, 04 ՍԼ 920 պետհամարանիշի ավտոմեքենան վարելով Կոտայքի մարզի Սարալանջ գյուղի կողմից դեպի Երևան քաղաքի ուղղությամբ եւ հասնելով Եղվարդ-Երևան ավտոճանապարհի 2-րդ կմ հատվածին, իրականացրել է ոչ պատշաճ և վտանգավոր երթևեկություն' ավտոմեքենան վարել է բնակավայրում սահմանված թույլատրելի առավելագույնը գերազանցող' առնվազն 71 կմ/ժ արագությամբ: Երթևեկության ընթացքում միաժ ամանակ օգտվելով հեռախոսակապից, ինքն իրեն զրկել է ավտոմեքենայի լիարժեք կառավարումն իրականացնելու տեխնիկական հնարավորությունից, թույլ է տվել ՃԵԿ-ի 65 և 66 կետերի, ինչպես նաև «ճանապարհային երթևեկության անվտանգության ապահովմա մասին» ՀՀ օրենքի 23 հոդվածի 3-րդ կետի, 24 հոդվածի 7-րդ կետի «Զ» ենթակետի պահանջներին հակասող գործողություններ, ստեղծել է վթարային իրադրություն, որի արդյունքում ավտոմեքենան դուրս է բերել երթևեկելի մասից դեպի աջ և առջևի մասով ընդհարվել է հողածածկ կողնակում կանգնած վիճակում գտնվող «Վազ 21214» մակնիշի, 870 ՕԼ 6 4 պ/հ ավտոմեքենայի հետևի մասին, որի հետևանքով «Վազ-21214» մակնիշի ավտոմեքենայի ուղևորներ էդվարդ Արթուրի Հակոբյանին և էդգար Հայկի Հակոբյանին անզգուշությամբ պատճառել է մահ, Տաթևիկ Արթուրի Հակոբյանի առողջությանը ծանր վնաս' որպես կյանքին վտագ սպառնացող, Հայկ Մարտիրոսի Հակոբյանի, էմմա Հայկի Հակոբյանի, ինչպես նաև ավտովարորդ Արթուր Մարտիրոսի Հակոբյանի առողջությանը, միջին ծանրության վնաս' առողջության տևական քայքայումով: