Հակոբ Հակոբյանը պարզաբանել է կուտակային բաղադրիչի տարիքային շեմի սահմանումը

«Կուտակային կենսաթոշակների մասին» օրենքի մի շարք դրույթների սահմանադրականության վերաբերյալ դատաքննությանը պատասխանող կողմի ներկայացուցիչ, ՀՀ ԱԺ պատգամավոր Հակոբ Հակոբյանը, ի պատասխան այդ օրենքում տարիքային խտրականության մասին դիմող կողմի պնդումներին, պարզաբանումներ տվեց:

«Օրենքը, որպես պարտադիր կուտակային բաղադրիչի մասնակից, նախատեսելով միայն 1974 թվականի հունվարի 1-ին և դրանից հետո ծնված անձանց, հիմք է ընդունում պետության կողմից կենսաթոշակային ապահովման փաստացի հնարավորությունը: Այս հանգամանքը նկատի ունենալով` ամրագրվել է տարիքային տարանջատման օբյեկտիվ չափանիշ` հիմնվելով իրական հնարավորության վրա»,- ասաց Հակոբյանը՝ հավելելով, որ միշտ էլ որևէ տարիքային շեմ սահմանելը կարող է խտրական թվալ:

«Միշտ կարելի է վիճարկել, թե օրինակ ինչու անձը 63 տարեկանում է անցնում թոշակի: Թե ինչո՞ւ երեխան պետք է մինչև 18 տարեկան լինի, այլ ոչ 21 տարեկանը համարվի երեխա: Ինչու՞ է դպրոցական տարիքը ներկայումս սկսվում վեցից և այլն»,- ասաց պատգամավորը՝ հավելելով նաև տարիքային սահմանափակումներ պարունակող այլ դեպքերի մասին: «Ինչո՞ւ է օրենքը սահմանում, որ ՀՀ Զինված ուժերում ժամկետային զինվորական ծառայության պարտականություն ունեն միայն 18 տարին բոլորած անձինք և ոչ թե 17 տարեկան 364 օրեկան անձինք»,- հարց հղեց Հակոբյանը:

ԱԺ պատգամավորը հակափաստարկ բերեց դիմող կողմի պնդումներին, թե պարտադիր բաղադրիչի կիրառումը սահմանափակում է սեփականության տնօրինման իրավունքը: «Այն հանգամանքը, որ պետությունը, Սահմանադրության մակարդակով, պարտավորություն է կրում ճանաչել և պաշտպանել անձանց սեփականության իրավունքը, որևէ կերպ չի ենթադրում, որ օրենքի մակարդակով չի կարող որոշակի ժամկետով սահմանափակվել անձանց սեփականություն հանդիսացող կոնկրետ բաղադրիչի օգտագործման և տնօրինման իրավունքը»,- ասաց Հակոբյանը:

Մինչ այդ, եզրափակիչ ելույթներ ունեցան դիմող կողմի ներկայացուցիչները:

ՀՀ Սահմանադրական դատարանում մարտի 31-ին շարունակում է «Կուտակային կենսաթոշակների մասին» ՀՀ օրենքի 5, 7, 8, 37, 38, 45, 49 և 86-րդ հոդվածների սահմանադրականության վերաբերյալ» գործի դատաքննությունը: Այսօր որպես պատասխանող կողմ հանդես են գալիս ՀՀ կառավարության ու Կենտրոնական բանկի ներկայացուցիչները: Դիմող կողմի ներկայացուցիչներն են ՀՀ ԱԺ պատգամավոր Արծվիկ Մինասյանը, փաստաբան Մերի Խաչատրյանը և իրավապաշտպան Արտակ Զեյնալյանը:

Դատաքննության առաջին փուլն անցկացվեց մարտի 28-ին, որտեղ որպես պատասխանող կողմ էր ներգրավված ՀՀ Ազգային ժողովը՝ ի դեմ ԱԺ պատգամավոր Հակոբ Հակոբյանի:

Հանրապետությունում հունվարի 1-ից գործարկվում է կենսաթոշակային պարտադիր կուտակային համակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափով պարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու են ֆոնդի կառավարիչների միջոցով: