«Դ!եմ եմ»-ը պատրաստվում է ձևակերպել իր պահանջները

Կուտակային կենսաթոշակային օրենքի վերաբերյալ Սահմանադրական դատարանի որոշումը «Դ!եմ եմ» շարժման ակտիվիստների համար ստեղծել է մի իրավիճակ, երբ աշխատողը որոշման 6-րդ կետով հնարավորություն է ստանում թույլ չտալու իրենից գանձել 5 տոկոս պարտադիր վճարը՝ տնօրինելով իր սեփականությունը, իսկ գործատուն ստիպված է տույժերի ենթարկվել: Սա հանգեցնում է նրան, որ գործատուն հայտնվել է խոցելի վիճակում, որն էլ կարող է ուժեղ ազդեցություն ունենալ բիզնես միջավայրի վրա։ Այս մասին լրագրողների հետ հանդիպման ժամանակ ասաց «Դ!եմ եմ» շարժման մասնակից Դավիթ Դավթյանը՝ հայտարարելով, որ շարժումը ապրիլի 9-ին կայանալիք ակցիայի ժամանակ կբարձրաձայնի այս խնդրի մասին։ «Մենք պետք է հստակ պահանջներ դնենք պետական գերատեսչությունների առջև և պահանջենք դրանց լուծումը։ Իսկ ապրիլի 12-ին կայանալիք ակցիայի ընթացքում այս խնդիրների մասին կտեղեկացնեն նաև հանրությանը»,-ասաց Դավթյանը։

«Դ!եմ եմ»-ի անդամ Վահան Դուրինյանը նշեց, որ գերատեսչություններից պահանջելու են հաշվետվության ձևի ինքնաշխատ դաշտը դարձնել խմբագրվող։ «Մենք պահանջում ենք, որ գործատուն հնարավորություն ունենա զրոյացնելու այդ դաշտը»,-ասաց նա։

Շարժան մեկ այլ անդամ՝ Արսեն Մանուկյանը հավելեց, որ ՍԴ որոշումը հնարավորություն է տալիս աշխատողին տնօրինելու իր սեփականությունը և չկատարելու վճարումներ։ Այսինքն' եթե աշխատակիցը չի ցանկանում վճարում կատարել, գործատուն պետք է հնարավորություն ունենա հաշվետվության մեջ լրացնել զրո։

«Դ!եմ եմ»-ի անդամ Մանուկ Զաքարյանն էլ նշեց, որ թեև նման իրավիճակում կոնֆլիկտ է առաջանում աշխատող-գործատու հարաբերություններում, սակայն դա չպետք է խոչընդոտ հանդիսանա։