Քաղաքացուն ծեծի ենթարկած Արդարադատության նախարարության աշխատակիցներն ազատվել են աշխատանքից

ՀՀ արդարադատության նախարարի պաշտոնակատար Հրայր Թովմասյանի հրամանով` ՀՀ ԱՆ քրեակատարողական վարչության այլընտրանքային պատիժների կատարման բաժնի Մալաթիա-Սեբաստիա բաժանմունքի պետ Տիգրան Մալխասյանը և նույն բաժնի Կենտրոն և Նորք-Մարաշ բաժանմունքի պետ Տիգրան Պետրոսյանն ազատվել են աշխատանքից:

Ինչպես տեղեկացրին ՀՀ արդարադատության նախարարության տեղեկատվության եւ հասարակայնության հետ կապերի բաժնից, ՀՀ ԱՆ քրեակատարողական վարչության այլընտրանքային պատիժների կատարման բաժնի Շենգավիթ բաժանմունքի պետ Գևորգ Մաթևոսյանի նկատմամբ կիրառվել է «խիստ նկատողություն» կարգապահական տույժ:

ՀՀ արդարադատության նախարարության աշխատակազմի օրինականության վերահսկողության տեսչության անցկացրած ծառայողական քննության արդյունքում պարզվել է նաև, որ ՀՀ ԱՆ ՔԿՎ հատուկ նշանակության բաժնի առաջին կարգի մասնագետ Ռոբերտ Թամարյանը ներկա չի եղել մարտի 24-ին տեղի ունեցած միջադեպին, ուստի, ՀՀ արդարադատության նախարարի պաշտոնակատար Հրայր Թովմասյանի ապրիլի 7-ի հրամանը՝ Թամարյանի լիազորությունները ժամանակավորապես դադարեցնելու մասին, հանվել է:

Մարդու իրավունքների պաշտպանին է դիմել 32-ամյա Արման Գասպարյանը և հայտնել, որ Արդարադատության նախարարության աշխատակիցները իրեն ծեծի են ենթարկել և հայհոյել: Նա Պաշտպանին է ներկայացրել նաև ձայնագրություն, որն, ըստ Արմանի' վկայում է միջադեպի մասին: Արմանը պատմել է, որ մարտի 24-ին' ժամը 13:00-ի սահմաններում, իր մեքենայով ընկերոջը տարել է Արդարադատության նախարարության այլընտրանքային պատիժների կատարման շենք: Կառույցի աշխատակիցներն ընկերոջն ընդունելուց հետո հրավիրել են նրան սենյակ, որտեղ ներկա են եղել 4-5 համազգեստով անձիք և բռնություն գործադրել նրա հանդեպ: Այս առիթով Պաշտպանը դիմել է Հատուկ քննչական ծառայություն և Արդարադատության նախարարություն' միջնորդելով համապատասխան միջոցներ ձեռնարկել և տեղեկացնել արդյունքների մասին: