Պարտադիր կուտակային համակարգի Աշոտյանի շրջաբերականն այլևս ուժի մեջ չէ

Կենսաթոշակային պարտադիր կուտակային համակարգի վերաբերյալ կրթության և գիտության նախարարության շրջաբերականը, որն ուղարկվել էր կրթական հաստատություններին, այլևս ուժի մեջ չէ: «Նոր կառավարության տեսակետը հստակ շարադրել է վարչապետ Հովիկ Աբրահամյանն իր 7 կետանոց դրույթներով ելույթում: Հստակ ասվել է, որ նոր օրենսդրական փոփոխություններով՝ «դե ֆակտո» կասեցվում է պարտադիր բաղադրիչը՝ մինչև օրենսդրական վերջնական փաթեթի ընդունումը: Որքանով տեղյակ եմ, այն քաղաքացիները, որոնք դիմում են գրելու և խնդրելու պահում չկատարել, բնականաբար, նրանց գալիք ամսվա աշխատավարձում պահումներ չեն կատարվի»,- կառավարության նիստից հետո նշեց ՀՀ կրթության և գիտության նախարար Արմեն Աշոտյանը՝ անդրադառնալով կուտակային կենսաթոշակային բարեփոխումների շուրջ առաջացած խնդրին:

Խոսելով կուտակայինի հարցով ԿԳՆ-ի առջև մանկավարժների բողոքի ցույցի մասին' Աշոտյանը նշեց, որ երեկ երկու անգամ հրավիրել է ակցիայի մասնակիցներին քննարկելու ոչ միայն այն խնդիրը, որն իրենց մտահոգում էր, այլև կրթության բնագավառին առնչվող հարցեր: «Մնում եմ այն կարծիքին, որ փողոցը շատ հարմար տեղ է խնդիրը բարձրաձայնելու համար, բայց հարմար չէ խնդիրները քննարկելու համար: Հատկապես մանկավարժների հետ հանդիպումները պետք է շատ բովանդակային անցնեն և այդ բովանդակային հանդիպումների ակնկալիքով կրկին հրավիրում եմ խնդրո առարկայով մտահոգ մանկավարժնե րին կրթության նախարարություն: Հատկապես, որ խնդիրը, որ ծագել է անհանգստությունը, կարգավորված է և այն շրջաբերականը, որն անհանգստության պատճառ էր դարձել, արտահայտում էր նախկին կառավարության տեսակետը»,- ասաց նախարարը: Միաժամանակ, Աշոտյանը հերքեց լուրերը, թե երեկվա ակցիայի ժամանակ ինքը լքել է նախարարությունը՝ նշելով, որ այդ ընթացքում անցկացրել է հանդիպումներ և քննարկումներ:

Ազգային ժողովը քննարկում է «Կուտակային կենսաթոշակների մասին» ՀՀ օրենքի 76-րդ հոդվածի գործողությունները կասեցնելու վերաբերյալ նախագիծը: