«Զվարթնոց»-ի գծային բաժնի ծառայողները թմրանյութ պահելու կասկածանքով 3 անձի են բերման ենթարկել

Ոստիկանության «Զվարթնոց» օդանավակայանի գծային բաժնի ծառայողների ձեռնարկած միջոցառումների շնորհիվ, մայիսի 6-ին` ժամը 17.30-ին, օդանավակայանի ժամանման սրահի մուտքի դիմացից, թմրանյութ պահելու և օգտագործելու կասկածանքով, բերման են ենթարկվել 1977թ. ծնված Սմբատ Չ.-ն, 1974թ. ծնված Բալաբեկ Մ.-ն և տաքսի ծառայություններից մեկի վարորդ, 1979թ. ծնված Գևորգ Զ.-ն` տաքսի ծառայությանը պատկանող, իրեն ամրակցված «Օպել Աստրա» մակնիշի ավտոմեքենայով: Նշված ավտոմեքենայի սրահի զննությամբ` վարորդի նստելատեղի հետևի հատվածի ռետինե ծածկոցի վրայից հայտնաբերվել է ներարկիչ` 3,5 մգ բաց դեղնագույն հեղուկ զանգվածով, որը, ըստ Սմբատ Չ.-ի բանավոր հայտարարության, թմրամիջոց է, պարաստել է իր օգտագործման համար: Հայտնաբերվածն ուղարկվել է փորձաքննության: Կատարվում է քննություն: