Ցմահ դատապարտյալ Արմեն Տեր-Սահակյանը կկարի բերանը. ընտանիքը մտահոգված է նրա առողջությամբ

«Նուբարաշեն» ՔԿՀ դատապարտյալ Արմեն Տեր-Սահակյանը արդեն 11 օր է` հացադուլ է հայտարարել, և չի դադարեցնում այն:

Արմեն Տեր-Սահակյանի պահանջն է` հանդիպում կազմակերպել ՀՀ նախագահի օգնական Գեորգի Կուտոյանի հետ:

Lurer.com-ի թղթակցի հետ զրույցում Արմեն Տեր-Սահակյանի որդին` Աբգար Տեր-Սահակյանը, իր մտահոգությունն է հայտնում հոր առողջական վիճակի մասին:

«Իմանալով հորս նպատակասլացությունը` համոզված եմ, որ մինչև իր պահանջը չկատարվի, դուրս չի գա հացադուլից, որն էլ անկանխատեսելի ավարտ կարող է ունենալ: Ես և ընտանիքս շատ ենք անհանգստանում հորս առողջության համար և խնդրում ենք իր պահանջը բավարարել»:

Նշենք, որ «Հայկական Ժամանակ» օրաթերթը, հղում կատարելով իր աղբյուրներին, այսօրվա համարում գրել էր, որ իր պահանջները չկատարելու դեպքում Արմեն Տեր-Սահակյանը պատրաստվում է կարել բերանը:

Հիշեցնենք, որ Արմեն Տեր-Սահակյանը Հանրապետության նախկին ՆԳ նախարար Վանո Սիրադեղյանի մերձավոր շրջանակներից էր, ով բանդայի պարագլուխ է եղել: Ըստ դատավճռի` առանձին քաղաքացիների և պաշտոնատար անձանց վրա հարձակումներ գործելու, վերջիններիս կողմից իրենց ծառայական պարտքը կատարելու կապակցությամբ նրանց սպանելու և այլ հանցագործությունների կատարման նպատակով 1992թ. ամռանը, ՀՀ ներքին գործերի նախարար Վանո Սիրադեղյանի հանձնարարությամբ, հովանավորությամբ և աջակցությամբ, Արմեն Տեր-Սահակյանը կազմակերպել և ղեկավարել է կայուն զինված հանցավոր խումբ՝ բանդա, որը գործել է մինչև բանդայի անդամների ձերբակալումը՝ 1998թ.։