Դատաբժիշկը պատասխանում է հանգուցյալ Շարբաթյանի քրոջը (տեսանյութ)

Դատաբժիշկ Վարուժ Սաքանյանը փորձաքննության արդյունքում հանգել է հետևության, որ փաստաբան Սամվել Շարբաթյանի մահը կարող էր վրա հասնել մեկ հարվածի հետևանքով: «Ես ասում եմ, որ ունեմ 1 հարվածի հետք, որը բերել է մահվան»,-դատարանում հարցաքննության ժամանակ նշեց փորձագետը:

Շարբաթյանի մահվան անմիջական պատճառը, ըստ փորձագետի, գլխուղեղի կենսական կարևորագուն ֆունկցիաների սուր խանգարումն է՝ պայմանավորված գլխի շրջանի վնասվածքներով (գանգուղեղային փակ բութ տրավմա, քթի հիմքի շրջանի արյունազեղում, զույգ ակնակապիճների շրջանի արյունահավաքներ, քթի բազմաբեկորային կոտրվածքներ, գլխուղեղի կարծրենու, փափուկ թաղանթի, ուղեղանյութի տարածուն արյունազեղումներ, գանգի հիմի ոսկրերի գծային կոտրվածք), որոնք էլ քթի հիմքի շրջանի վնասվածքին ուղեկցող ախտանիշներ են: «Այսինքն՝ քթի հիմի շրջանում ստացած վնասվածքի հետևանքով կոտրվում են քթի ոսկրերը կամ առաջային գանգափոսի ոսկրերը, որպես ուղեկցող ախտանիշներ ի հայտ են գալիս ակնակապիճների շրջաններում արյունահավաքներ, արյունահավաքները գալիս են ներսից, ոչ թե դրսի ազդեցության հետևանք են, այլ քթի կոտրվածքի և գանգի ոսկրերի կոտրվածքի հետևանքով, գանգի ոսկրերի և հյուսվածքների մեջ մազանոթները պատռվում են և ներսից արտահոսում դեպի ակնակապիճների խոռոչների տակ»,-քթի շրջանի հարվածին ուղեկցող վնասվածքներն է բացատրում է դատաբժիշկը` այն դասակարգելով «ակնոցների համախտանիշ» գանգուղեղային վնասվածքին:

«Գանգուղեղային վնասվածքի ազդող ուժի հպման տեղը տեղակայված է քթի հիմքի շրջանում, ունեցել է առջևից հետ և հորիզոնականին մոտ ուղվածություններ, ուժգին հարվածային ուժի ներգործությունից նշված վնասվածքը ստանալու պահին Շարբաթյանը քթի հիմքի շրջանով ուղղված է եղել դեպի վնասվածք պատճառող գործիքը կամ առարկան, և առանձին վերցված՝ քթի հիմքի շրջանի վնասվածքը, ուղեկցված քթի արյունազեղումով, քթի ոսկրերի կոտրվածքով, ակնակապիճների արյունահավաքներով և գանգուղեղային վնասվածքով, առաջացրել են առողջությանը ծանր վնաս՝ կյանքին վտանգ սպառնացող, և հանդիսացել են նրա մահվան անմիջական պատճառը»,-նշված է Շարբաթյանի մահվան դատաբժշկական փորձաքննության եզրակացության մեջ: