ՄԻՊ գրասենյակը խնայողություններ է արել

Մարդու իրավունքների պաշտպանի գրասենյակը 2013թ. ընթացքում խնայողություններով է աշխատել: Այս մասին Ազգային ժողովի մարդու իրավունքների պաշտպանության և հանրային հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում տեղեկացրեց ՀՀ մարդու իրավունքների պաշտպան Կարեն Անդրեասյանը: «Տնտեսում ենք արել 2013թ. ընթացքում, մենք չարչարվում ենք, որ չծախսենք ամբողջը ու խնայենք: Այստեղ փոքրիկ, համեստ խնայողություններ եղել են»,- ասաց Անդրեասյանը` հավելելով, որ խնայված գումարներն ուղարկվել են կառավարության պահուստային ֆոնդ ու դրանց դիմաց ստացել են համակարգիչներ:

Մարդու իրավունքների պաշտպանի գրասենյակն, ըստ պլանի, պետք է 2013-ին ունենար 5200 քաղաքացու դիմում: Անդրեասյանը շեշտեց, որ դրա փոխարեն իրենք ունեցել են 4609 փաստացի դիմում, սակայն սա չի նշանակում, որ իրենց ավելի քիչ թվով քաղաքացիներ են դիմել, այլ նրանց բողոքները խմբավորվել են ու ներկայացվել կոլեկտիվ դիմումի տեսքով: Իսկ դիմած քաղաքացիների թիվը 6809 է եղել:

«Որքան էլ չափենք մարդու իրավունքների պաշտպանությունը, արդյունքները թվով չեն չափվում, այլ ստացված դրական զարգացումներով: Ես ինքս միշտ դժգոհ եմ եղել, երբ մեր համակարգային խնդիրները լուծում չեն ստացել կամ մեր նախաձեռնությունները դրական եզրակացություն չեն ստացել»,- ասաց նա:

Անդրեասյանը շեշտեց, որ իր պաշտոնավարման ընթացքում առաջին անգամ վերջին ամիսներին իրենք արդյունավետ են եղել ոչ միայն անհատական դիմումների պաշտպանության գործում, այլ համակարգային խնդիրների լուծման մեջ: