ՄԻՊ գրասենյակում ավելացել են ձեռնարկատիրական իրավունքների խախտումների վերաբերյալ դիմումները

Մարդու իրավունքների պաշտպանի զեկույցում, որը կքննարկվի առաջիկա լիագումար նիստում, մանրամասն ներկայացված են ձեռնարկատիրական իրավունքների խախտման հետ կապված խնդիրները: Այս մասին Ազգային ժողովում ՀՀ 2013թ. պետական բյուջեի կատարողականի քննարկման ժամանակ ասաց ՀՀ մարդու իրավունքների պաշտպան Կարեն Անդրեասյանը՝ պատասխանելով ԲՀԿ խմբակցության պատգամավոր Միքայել Մելքումյանի հարցին, թե արդյոք ՄԻՊ-ը տեղյա՞կ է՝ որոնք են բազմաթիվ ընկերությունների փակվելու պատճառները և իրենք այդ հարցով դիմումներ ստացե՞լ են: «Զեկույցում առանձին բաժին ենք դրան հատկացրել, երկու գլուխների տակ անդրադաձրել ենք ՊԵԿ և ՏՄՊՊՀ գործունեությանը: Մենք ոչ միայն դիմումներին ենք հետևում, այլև ընդհանուր ուսումնասիրություններ ենք կատարում, մեզ անգամ մեղադրում են, որ ավանդական շրջանակներից դուրս ենք գալիս, մենք դրան համաձայն չենք, անում ենք Սահմանադրությամբ մեզ վերապահվածը: Եթե համեմատություն անեմ, երեք տարի առաջ մեզ դիմում էր, երևի, տարեկան մեկ ընկերություն, այժմ դրանց թիվը տասնյակներ են: Մենք սեփական նախաձեռնությամբ էլ ենք ուսումնասիրություններ անում»,- ասաց նա:

Անդրեասյանը ներկայացրեց մի փոքրիկ էպիզոդ: Լոլիկի ներկրման և արտադրության շուկայում խնդիրներին հետևել փորձելով՝ դիմել են ՊԵԿ, որն իրենց հարցմանն ի պատասխան, երբ ցուցակ են խնդրել, պատասխան են ստացել, թե առևտրային գաղտնիք է: «Սա մեզ համար տարօրինակ է, որովհետև ինձ հասու է պետական գաղտնիքի նույնիսկ ամենագաղտնիացված տեղեկատվությունը, սա ուղղակի ավանդույթների պակաս է»,- ասաց նա՝ հավելելով, որ իրենք ուսումնասիրում են և կներկայացնեն ըստ շուկաների՝ խոչընդոտներն ու հակամրցակցային խնդիրները: