Իրանի և «վեցյակի» բանակցությունների հերթական փուլը կարող է մեկնարկել հուլիսի 2-ին Վիեննայում

Իրանի և «վեցյակի» (ՄԱԿ-ի Անվտանգության խորհրդի հինգ մշտական անդամները և Գերմանիան) բանակցությունների հերթական փուլը «կարող է հուլիսի 2-ին մեկնարկել Վիեննայում»: Այդ մասին ԻՏԱՌ-ՏԱՍՍ-ին հայտնել է արևմտյան պատվիրակության մի աղբյուր:

«Մինչև (Իսլամական Հանրապետության և «վեցյակի») միջանկյալ համաձայնագրի ժամկետի լրանալը մնում է ուղիղ մեկ ամիս,-գործակալությանն ասել է զրուցակիցը:- Առաջընթաց ենք ակնկալում ապագա համապարփակ համաձայնագրի տեքստի համաձայնեցման գործընթացում»:

Կողմերը հույս ունեն մինչև հուլիսի 20-ը հասցնել համաձայնեցնել համապարփակ փաստաթուղթը, որը պետք է երաշխավորի Թեհրանի միջուկային ծրագրի խաղաղ բնույթը:

Վիեննայի բանակցությունների հինգերորդ փուլի եզրափակիչ օրը հունիսի 20-ին սկսվել է Իրանի և «վեցյակի» փորձագետների կոնսուլտացիաներով:

Պլանավորվում է, որ փորձագիտական հանդիպումից հետո բանակցությունների սեղանի շուրջ կրկին կնստեն եվրոպական դիվանագիտության ղեկավար Քեթրին Էշթոնը, որը համակարգում է «վեցյակի» գործունեությունը, և Իսլամական Հանրապետության արտաքին գործերի նախարար Ջավադ Զարիֆը:

Նախօրյակին կողմերին հաջողվել է փոքր-ինչ առաջ շարժվել բանակցություններում: Ինչպես լրագրողներին հայտնել է Զարիֆը, համաձայնագիրը, որը կոչված է փակել «իրանական միջուկային դոսյեն», վերջապես անվանում է ստացել: Ինչպես հայտնել է արևմտյան պատվիրակություններից մեկի մի աղբյուր, նախկինի պես հիմնական վիճահարույց հարցերը մնում են Իրանի հարստացուցիչ ծրագրի ծավալը, այդ թվում՝ ցենտրիֆուգների թվաքանակն ու որակը, Արաքի միջուկային ռեակտորի պարամետրերը և Թեհրանի նկատմամբ գործող տնտեսական պատժամիջոցների վերացման տեմպերը: