Վրաստանի նախագահը չի մեկնի Բրյուսել՝ Եվրամիության հետ ասոցացման համաձայնագրի ստորագրմանը

Վրաստանի նախագահ Գեորգի Մարգվելաշվիլին չի մեկնի Բրյուսել՝ մասնակցելու Եվրամիության հետ ասոցացման մասին համաձայնագրի ստորագրմանը, հանրապետության պատվիրակությունը կգլխավորի վարչապետ Իրակլի Ղարիբաշվիլին: Այդ մասին Թբիլիսիում կայացած ճեպազրույցի ժամանակ հայտնել է Վրաստանի արտաքին քաղաքական գերատեսչության ղեկավար Մայա Փանջիկիձեն:

«Վրաստանի կողմից համաձայնագիրը կստորագրի Իրակլի Ղարիբաշվիլին, նրա գլխավորած պատվիրակության կազմում կլինի չորս նախարար»,- ասել է Փանջիկիձեն:

«Եվրամիության հետ ասոցացման մասին համաձայնագիրն ստորագրվելու է հունիսի 27-ին Բրյուսելում, որտեղ կհավաքվեն ԵՄ-ի անդամ երկրների կառավարությունների ղեկավարները:

Վրաստանում վերջին մեկ ամսվա ընթացքում արծարծվում էր այն թեման, թե ում պետք է վստահվի Վրաստանի անունից համաձայնագրի ստորագրման իրավունքը: Նախագահ Գեորգի Մարգվելաշվիլին հայտարարում էր, որ ԵՄ-ի հետ ասոցացման համաձայնագիրը պետք է ստորագրի ինքը՝ որպես պետության ղեկավար, բայց ընդգծում էր, որ մտադիր չէ «վիճարկել» հայտարարված որոշումն այն մասին, որ փաստաթղթի տակ իր ստորագրությունը կդնի վարչապետը:

Մարգվելաշվիլին հայտարարում էր, թե չգիտի՝ ինքն արդյոք լինելու է այն պատվիրակության կազմում, որը հունիսի վերջին մեկնելու է Բրյուսել՝ ասոցացման մասին համաձայնագրի ստորագրմանը: «Որոշումն ընդունվելու է ոչ թե ելնելով իմ ցանկությունից, այլ անհրաժեշտությունից»,- լրագրողներին ասել է Մարգվելաշվիլին:

Վրաստանի կառավարության ղեկավար Իրակլի Ղարիբաշվիլին իր հերթին օրերս կայացած ճեպազրույցներից մեկի ժամանակ կոչ է արել լրագրողներին՝ դրամայի չվերածել թեման և ընդգծել է, թե «մեր կողմից արձանագրված տարբեր դիրքորոշումները նշանակում են, որ երկրում կա իրական ժողովրդավարություն»:

Թե Վրաստանի վարչապետը, թե նախագահը ներկայացնում են նույն քաղաքական ուժը՝ «Վրացական երազանք» կոալիցիան, որը հանրապետությունում իշխանության գլուխ է եկել 2012 թվականի խորհրդարանական ընտրությունների արդյունքում, հաղորդել է «Նովոստի Գրուզիան»: